Bħala kontorn infittxu ħafna l-patata; il-biċċa l-kbira tkun il-forn, moqlija, mgħollija jew maxx. Din hija riċetta ta’ insalata tal-patata li tmur tajjeb ma’ laħam u tiġieġ, imma speċjalment mal-ħut.
Preparazzjoni: 10 minuti
Ħin totali: 25 minuta
Isservi: 4-6 persuni
Ingredjenti:
- 500 g patata, imqaxxra u mqattgħa biċċiet kbar
- 1 basla żgħira ħamra, imqattgħa rqiq
- 2 mgħaref kappar, imlaħlaħ
- 4-6 gherkins żgħar, imqattgħin roti rqaq
- 3 imgħaref nagħniegħ frisk, imqatta’
- 4 imgħaref mayonnaise
- Weraq tan-nagħniegħ, biex iżżejjen
Għaz-zalza:
- 100 ml stokk tal-ħaxix sħun
- 1 kuċċarina mustarda Dijon
- 2 imgħaref ħall tal-inbid abjad
- 4 imgħaref żejt taż-żebbuġa
- Melħ u bżar mitħun frisk
Tħejjija:
- Poġġi l-patata f’kazzola u għattiha bl-ilma, żid ftit melħ u poġġiha fuq nar għoli. Kif tiftaħ tagħli baxxi n-nar u għalliha għal 12-15-il minuta jew sakemm tara li saret mingħajr ma titfarrak.
- Sadanittant, fi skutella ħallat flimkien l-istokk, il-mustarda, il-ħall, iż-żejt taż-żebbuġa u ftit melħ u bżar.
- Saffi l-patata u poġġiha fi skutella kbira. Kissirha ftit bil-furketta mingħajr ma tgħaffiġha ħafna. Żid iz-zalza tal-mustarda u ħawwad; imbagħad żid ukoll il-kappar, il-gherkins, il-mayonnaise u n-nagħniegħ u ħawwad bil-mod.
- Servi l-patata sħuna mżejna bil-weraq tan-nagħniegħ.
Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.