Il-kuskus jagħmel bażi ideali għall-insalati – tippreparah fi ftit ħin biss u tista’ tħalltu ma ħafna ingredjenti oħra. F’din l-insalata veġeterjana huwa mħallat maċ-ċiċri, tamal, larinġ u pistaċċ.
Ingredjenti
Għal 4 persuni
- 175g kuskus
- 300ml stokk tal-ħaxix mingħajr melħ, jaħraq
- 2 larinġiet
- Bott ċiċri (400g), imsaffi u mlaħlaħ
- 125g tamal mingħajr għadma, imqatta’
- 50g pistaċċ mingħajr qoxra, imqatta’
- 4 mgħaref nagħniegħ frisk, imqatta’
- Melħ u bżar mitħun frisk
- ½ kuċċarina qoxra maħkuka ta’ larinġa
- 2 mgħaref żejt taż-żebbuġa ekstra verġni
- 2 mgħaref meraq tal-lumi
- 1 kuċċarina paprika
- Poġġi l-kuskus f’bieqja kbira u ferra’ fuqu l-istokk jaħraq. Ħallih joqgħod għal 10 minuti jew sakemm jinxtorob l-istokk kollu.
- Sadanittant, f’bieqja ħallat flimkien il-qoxra maħkuka tal-larinġa, iż-żejt taż-żebbuġa, il-meraq tal-lumi u l-paprika.
- B’furketta tella’ l-kuskus u waqt li jkun għadu sħun roxx fuqu t-taħlita taċ-ċitru.
- Qaxxar iż-żewġ larinġiet billi tpoġġi l-larinġa wieqfa fuq platt u b’sikkina l-ewwel taqta’ l-biċċiet ta’ fuq u ta’ taħt, imbagħad tqaxxar bis-sikkina stess mal-kurvaturi tal-larinġa minn fuq għal isfel sakemm iddur id-dawra kollha. Qattagħha flieli bis-sikkina u aqsam kull felli min-nofs.
- Mal-kuskus żid il-flieli tal-larinġ u l-meraq li ħareġ minnhom fil-platt, iċ-ċiċri, it-tamal, il-pistaċċ u 2 mgħaref min-nagħniegħ. Żid melħ u bżar kemm tiggosta u ħawwad. Ħalli l-kuskus joqgħod għal siegħa qabel isservih biex it-togħmiet jilħqu jamalgamaw.
- Roxx bil-kumplament tan-nagħniegħ qabel isservih.
Ippruvajt din ir-riċetta? Kif sibtha? Għidilna billi tħalli kumment hawn taħt.
