L-insalati jistgħu ikunu kontorn għal ma’ ikel ieħor imma jistgħu ikunu wkoll ikla minnhom infushom, bħal din l-insalata b’bażi ta’ għads aħdar.
Ħin: 45 minuta
Isservi: 4 persuni
Ingredjenti:
- 250 g għads aħdar, imnaddaf u maħsul sew
- 200 g ġobon feta
- 3 bżariet ħelwin (capiscum), aħmar, isfar u oranġjo
- Basla żgħira imqattgħa flieli rqaq
- Ponn tursin frisk, imqatta’
- Ponn ħabaq frisk, imqatta’
- 100 g żebbuġ iswed mingħajr għadma
- 200 g tadam ċirasa, maqsum min-nofs
- Melħ u bżar mitħun frisk
- 4 mgħaref żejt taż-żebbuġa
- 2 imgħaref ħall tas-sidru (cider vinegar)
- ¼ kuċċarina paprika
- 2 sinniet tewm, misħuqin
Tħejjija:
- Poġġi l-għads f’kazzola u għattih bl-ilma.
- Żid niskata melħ u poġġih fuq nar għoli sakemm jiftaħ jagħli, imbagħad baxxi n-nar u tektek għal bejn 20-30 minuta, mingħajr ma ssajjaru żżejjed.
- Sadanittant, aqsam min-nofs għat-tul u naddaf il-bżar ikkulurit, idilku bi ftit żejt taż-żebbuġa u ixwih fuq grilja sakemm jibda jirtab. Qattgħu strixxi għat-tul.
- Ħallat flimkien iż-żejt taż-żebbuġa, il-ħall balsamiku, il-paprika u t-tewm fi skutella għal aktar tard.
- Saffi l-għads u kessħu taħt l-ilma kiesaħ. Fi skutella kbira ħallat flimkien l-għads, il-bżar ikkulurit, il-basla, it-tadam, iż-żebbuġ, u t-tursin u l-ħabaq. Roxx bil-melħ u l-bżar u ħawwad sewwa.
- Qassam it-taħlita fuq 4 platti u farrak il-ġobon feta fil-wiċċ. Roxx bit-taħlita taż-żejt u ħall u servi.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!