M'hemmx għalfejn taqta' l-insalati għalkollox fix-xitwa sempliċement għax tippreferi ikla sħuna. Agħżel minflok li tagħmel riċetti oħrajn għal insalati sħan u xitwin, bħal din ir-riċetta tal-insalata sħuna tar-ross stil Lebaniż. Jekk tixtieq, tista' tbiddel ir-ross għal dak ismar għal togħma differenti.
Preparazzjoni: 10 sa 15-il minuta
Tisjir: 15 il-minuta
Isservi: 2-3
Ingredjenti:
- 100 g ross Tilda Pure Basmati Rice
- 1-2 imgħaref żejt taż-żebbuġa
- Bżaru aħmar kbir, neħħilu ż-żerriegħa u qattgħu rqiq
- Kuċċarina trab tal-kemmun (ground cumin)
- 125 g ġobon halloumi, imqatta' kaxxi kaxxi
- 50 g tadam imqadded (mhux niexef ħafna), imqatta'
- 30 g żebbuġ iswed imqatta'
- 110 g ċiċri tal-bott, neħħi l-ilma
- Mazz rukola
- Ftit weraq tal-kosbor (coriander), imqatta'
- Ftit weraq tan-nagħniegħ (mint), imqatta'
- Il-meraq u l-qoxra maħkuka ta' nofs lumija
Tħejjija:
- Sajjar ir-ross billi ssegwi l-istruzzjonijiet fuq il-pakkett.
- Fl-istess ħin, saħħan iż-żejt ġo taġen fuq nar medju u aqli l-bżar aħmar, il-kemmun u l-halloumi għal 2 minuti.
- Żid it-tadam imqadded, iż-żebbuġ u ċ-ċiċri u saħħan għal 3 minuti.
- Poġġi r-ross imsajjar mat-taħlita ġot-taġen, u żid ir-rukola, il-kosbor, in-nagħniegħ u l-lumi.
- Servi l-platt sħun mal-jogurt Grieg u l-ħobż pitta msaħħan.
Għoġbitek din ir-riċetta? Ħalli l-kummenti tiegħek hawn taħt.