Riċetta: Insalata bir-rummien u l-gorgonzola

Riċetta Insalata bir-rummien u l-gorgonzola

Bħalissa huwa l-istaġun tar-rummien. Għalkemm aħna mdorrijin li r-rummien infesdquh biex nikluh hekk biss, issib riċetti, kemm ħelwin u kemm mhumiex, li s-snien jew il-meraq tar-rummien huwa wieħed mill-ingredjenti tagħhom. Ir-rummien kien wieħed mill-ewwel frott ikkultivat u narawh prominenti fl-istorja tal-arti,  kultura, u reliġjon. Huwa sors ta’ diversi vitamini , antiossidanti, potassju, ħadid u aċidu foliku.

Ingredjenti

Għal 4 persuni

  • 5 kikkri insalata ħadra mħallta
  • 5 kikkri weraq tal-aruka tari
  • 1 rummiena
  • 60g ġewż pecan, imkisser
  • 120g ġobon gorgonzola, imfarrak

Biex isservi

  • 4 mgħaref meraq tar-rummien
  • 3 mgħaref ħall tal-inbid abjad
  • 1 mgħarfa basal imqatta’ rqiq ħafna
  • 1 mgħarfa għasel
  • 5 mgħaref żejt tż-żebbuġa
  • 1 niskata melħ
  • Bżar mitħun frisk

 

Ibda billi taqla’ s-snien minn mal-qoxra tar-rummiena, mingħajr ma taqla’ magħhom ir-rita s-safra.

F’bieqja kbira ħallat flimkien il-ħaxix tal-insalata, il-weraq tal-aruka, is-snien tar-rummien, il-ġewż pecan u l-ġobon gorgonzola.

F’buqar ħabbat flimkien il-meraq tar-rummien, il-ħall tal-inbid abjad, il-basal, l-għasel, iż-żejt taż-żebbuġa, il-melħ u l-bżar.

Roxx il-likwidu fuq l-insalata u servi fil-pront.