Riċetta: insalata bil-gambli u t-tuffieħ aħdar

By Takeaway (Own work) [CC-BY-SA-3.0 (http://creativecommons.org/licenses/by-sa/3.0)], via Wikimedia Commons

Qatt immaġinajt li tħallat il-frott tal-art ma' frott il-baħar f'xi riċetta? Forsi din hi idea ġdida li qatt m'għaddietlek minn moħħok iżda kultant huwa tajjeb li wieħed jesperimenta ftit bit-togħmiet, speċjalment għax dan jista' jwassal għal aktar ideat fuq kif tista' tħallat ingredjenti differenti minn kif int imdorri.

Ipprova din ir-riċetta għal insalata bil-gambli u t-tuffieħ aħdar.

 

Isservi: 4 persuni
Preparazzjoni: 30 min
Ħin totali: 30 min

Ingredjenti:

  • 700g gambli kbar (madwar 20-25 gamblu) imqaxxrin u mnaddfin
  • 2 litri ilma
  • 2 imgħaref melħ
  • 3 tadamiet komuni (mit-tond)
  • 1/2 basla ħamra
  • 2 tuffieħat kbar (preferibilment Granny Smith) 
  • Felfel (bżar aħmar) imnixxef, skont il-gosti
  • Meraq tal-lajm, skont il-gosti (lesti 3-4)
  • Stokk tal-ħut, skont il-gosti (lesti 1/4 kikkra)
  • Kikkra u nofs anakardji (cashews) mixwijin, preferibilment minajr melħ
  • 1/3 kikkra weraq tan-nagħniegħ mqatta' bl-idejn

 

Tħejjija:

Għalli l-ilma u l-melħ ġo borma. Baxxi n-nar sakemm l-ilma għadu qed itektek imma mux qed ibaqbaq. (Jekk għandek termometru, ara li l-ilma jkun bejn 160 u 180 C għax din hija t-temperatura ideali biex issajjar il-gambli.)

Sajjar il-gambli – ħawwadhom kultant – sakemm il-laħam tagħhom isir opak. Dan il-proċess m’għandux jieħu iktar minn minuta. Saffi l-ilma u poġġi l-gambli fi skutella kbira u warrab.

Qatta’ t-tadam f’kunjardi (wedges) ta' madwar nof pulzier u poġġieh fi skutella mal-gambli.

Qaxxar il-basla u qattagħha għat-tul fi strixxi rqaq. Poġġiha fi skutella mal-gambli u t-tadam.

Naddaf it-tuffieħ mill-qalba, qattgħu fi strixxi rqaq u żidu mal-kumplament tal-ingredjenti fl-iskutella.

Ħawwar bil-meraq tal-lumi, felfel u stokk tal-ħut skont il-gosti. Żomm f’moħħok li dawn il-kwantitajiet jinbidlu skont il-ħlewwa tat-tadam u t-tuffieħ u kemm inti tiflaħ għall-ikel jaħraq. It-togħma ta' dan il-platt għandu jkun prinċipalment naqra qares, ftit mielaħ u naqra ħelu minħabba l-frott. Nagħtik parir tibda bil-mod bil-lumi u s-stokk tal-ħut u żomm f’moħħok li jekk l-anakardi huma melħin għandek tuża inqas stokk tal-ħut.

Żid l-anakardi u n-nagħniegħ u ħawwad kollox flimkien.

Servi immedjatament, jew waħdu bħala insalata jew ma ftit ross mgħolli.

 

Ara l-filmat t'hawn taħt (miġjub fuq YouTube minn Chef Michael Pardus) biex tara kif tista' ssajjar il-gambli.

 

 

Biex tesperimenta b'aktar riċetti fantażjużi bit-tuffieħ, ikklikkja hawn: Riċetti interessanti bit-tuffieħ għall-ħarifa.