Tradizzjonalment magħruf bħala 'spoonbread,' il-ħobż tal-qamħirrun huwa tipiku tan-naħa t'isfel tal-Istati Uniti, u hemm min jemmen li r-riċetta oriġinali ġejja mill-Amerikani indiġini. Għalkemm jissejjaħ 'ħobż,' fil-verità l-ispoonbread iktar jixbah xi pudina fil-konsistenza tiegħu, u tipikament jittiekel ma' xi ikla laħam il-forn.
Isservi: 6
Ħin: 55 minuta
Ingredjenti:
- 2 imgħaref butir mhux mielaħ Kerrygold (u ftit iktar għad-dixx tal-forn)
- 1/2 basla żgħira mqattgħa
- Bżaru jalapeño mqatta'
- Melħ oħxon u bżar iswed mitħun
- 2 kikkri ħalib sħiħ
- 2 kikkri qamħirrun tal-friża
- 1/2 kikkra qamħirrun isfar mitħun (cornmeal)
- 4 bajdiet kbar, ifred l-isfar
Tħejjija:
- Saħħan il-forn għal 190 °C.
- Idlek dixx tal-forn ta' 20 ċm bil-butir.
- Dewweb il-butir ġo kazzola fuq nar medju-għoli.
- Żid il-basla u l-jalapeño, ftit bżar u melħ. Sajjar għal madwar 5 minuti jew sakemm il-basla tirtab.
- Żid il-ħalib ul-qamħirrun u sajjar għal madwar 3 minuti sakemm il-ħalib ikun jaħraq ħafna imma mhux jagħli.
- Żid il-cornmeal u sajjar għal madwar 2 minuti jew sakemm it-taħlita tagħqad, dejjem ħawwad.
- Neħħi min-nar u ħalli jibred għal madwar 10 minuti. Żid l-isfar tal-bajd u ħabbat sew.
- Ġo skutella oħra kbira, ħabbat l-abjad tal-bajd sakemm isir kollu ponot. Itwi fit-taħlita tal-qamħirrun, imbagħad ferragħ ġod-dixx.
- Aħmi fil-forn għal madwar 30-35 minuta sakemm il-ħobż jismar fil-wiċċ u jissoda fin-nofs. Dawwar id-dixx wara kwarta. Ħalli jibred għal 5 minuti qabel isservi.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
