Riċetta ta’ ħelu li huwa verżjoni differenti ta’ ‘ħelwa’ bħalma hi l-ħelwa tat-Tork li mdorrijin naraw u nixtru fil-ħwienet tagħna. Ħelu li jinżel tajjeb ħafna ma’ kikkra kafè qawwi.
Ħin: 50 minuta
Isservi: 8
Ingredjenti:
- 250g ġewż
- 250g lewż, mingħajr qoxra
- 450g tamal, maqsum min-nofs u mingħajr għadma
- 50g ġunġlien
- 3 kuċċarini ilma żahar
- Żokkor tal-ġelu (icing sugar), biex troxx
Tħejjija:
- Saħħan il-forn għal temperatura ta’ 180°C. Inkalja l-ġewż u l-lewż separatament għal 8-10 minuti, jew sakemm jiħmaru.
- Kisser il-ġewż u l-lewż, imbagħad poġġihom fi proċessur tal-ikel flimkien mal-kumplament tal-ingredjenti u kisser sakemm jitħallat kollox. Iksi landa ta’ 15ċm x 24ċm bil-karta forn, ifrex it-taħlita fil-landa u erġa’ iksi l-wiċċ bil-kartaforn. Ippressa ’l isfel kemm tista’ (uża xi ħaġa ċatta bħal kaxxa tal-plastik) u ffriża għal 30 minuta.
- Qatta’ fi 8 porzjonijiet u roxx biz-zokkor tal-ġelu. Dan il-ħelu jżomm f’reċipjent magħluq sew fil-friġġ għal ġimagħtejn.
Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.