Riċetta: Ħbejżiet bil-ħxejjex aromatiċi

Bread with herbs- Ħbejżiet bil-ħxejjex aromatiċi

Read this in English: Recipe: Bread buns with herbs

Dawn il-ħbejżiet tagħmilhom aktar malajr minn ħobż ieħor għax minflok ħmira fihom bikarbonat tas-sodju u b’hekk m’għandhomx bżonn ħin biex titla’ l-għaġina qabel tinħema.

Ħin: siegħa

Kwantità: 12

Ingredjenti:

  • 100 g butir
  • 3 basliet ħodor żgħar (spring onions), imqattgħin irqiq
  • 300 g dqiq plain
  • 150 g dqiq self-raising
  • 3 kuċċarini trab tal-ħami (baking powder)
  • ½ kuċċarina bikarbonat tas-sodju (bicarbonate of soda)
  • 4 kuċċarini zokkor
  • Mgħarfa tursin frisk, imqatta’ rqiq
  • Mgħarfa ħabaq frisk, imqatta’ rqiq
  • 125 ml ħalib
  • 3 bajdiet, imħabbtin ħafif
  • Bajda mħabbta ma’ mgħarfa żejt taż-żebbuġa, biex tidlek

Tħejjija:

  1. Saħħan il-forn għal temperatura ta’ 200°C. Idlek tilar kbir bil-butir u roxxu bid-dqiq.
  2. Dewweb il-butir f’taġen fuq nar moderat u qalli l-basal sakemm jirtab.
  3. Għarbel id-dqiq plain, id-dqiq self-raising, it-trab tal-ħami u l-bikarbonat tas-sodju fi skutella kbira. Żid iz-zokkor, it-tursin u l-ħabaq u ħawwad kollox flimkien.
  4. Fi skutella oħra ħabbat flimkien il-bajd u l-ħalib, u żid magħhom il-basal ukoll.
  5. Żid din it-taħlita ma’ dik tad-dqiq u għaqqad kollox b’mgħarfa.
  6. Roxx il-mejda bid-dqiq, aqleb it-taħlita fuqha u għaġen sakemm ikollok għaġina lixxa.
  7. Aqsam l-għaġina fi 12-il biċċa. Ifforma kull biċċa f’ballun u poġġihom fuq it-tilar.
  8. Idlek il-wiċċ ta’ kull ħbejża bit-taħlita ta’ bajd u żejt taż-żebbuġa u aħmi għal 30-35 minuta jew sakemm ikunu telgħu u ħmaru sew.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Ara lista ta' ħxejjex u frott skont l-istaġun