Riċetta: Ġulepp taċ-ċikkulata

liquid chocolate

Din hija riċetta sempliċi u tajba biex tagħmel il-ġulepp taċ-ċikkulata. Dan il-ġulepp huwa versatili ħafna fl-użu tiegħu u tista' tużah biex iżżejjen ġelati u tazzi tal-milkshakes, kif ukoll biex tagħti dehra u togħma iktar rikka lil xi ħelu li għamilt meta tasal biex isservih.

Preparazzjoni: 5 minuti

Tisjir: 5 minuti

Ħin totali: 10 minuti

Din ir-riċetta toħroġ daqs pinta (nofs litru) ġulepp.

Ingredjenti:

  • Kikkra trab taċ-ċikkulata
  • Kikkra u nofs zokkor abjad
  • Kuċċarina essensa tal-vanilja
  • Kikkra u nofs ilma
  • Ponta melħ

 

Tħejjija:

  1. Ħallat l-ilma, iz-zokkor, it-trab taċ-ċikkulata u l-melħ flimkien ġo kazzola fuq nar baxx.
  2. Ħawwad kontinwament b'furketta jew għodda tat-taħbit sakemm it-taħlita tagħqad u tibda ttektek.
  3. Neħħi minn fuq in-nar u żid l-essensa tal-vanilja; ħawwad naqra oħra.
  4. Servi sħun jew għatti u żomm fil-friġġ sakemm isservi.