Il-panċetta tixbah ħafna ’l-bacon imma għandha togħma partikolati li ma tidfinx it-togħmiet l-oħra tal-platt. Dawn il-fusilli b’ingredjenti sempliċi joħolqu palat pjaċevoli immens fi ftit minuti.
Ħin: 30 minuta
Isservi: 4 persuni
Ingredjenti:
- 400 g għaġin fusilli
- 2-3 tadamiet imqattgħin dadi, jew 250 g tadam ċirasa maqsum min-nofs
- 150 g panċetta, imqattgħa
- 2 basliet imqattgħin flieli rqaq, jew kurrat imqatta’ roti
- 2 sinniet tewm, imqattgħin
- Bżaru isfar ħelu (capiscum), imqatta’ strixxi rqaq
- 150 g ġbejniet imnixxfin tal-bżar, maħkukin oħxon
- Ponn weraq tar-rucola
- 80 ml żejt taż-żebbuġa
- Melħ u bżar mitħun frisk
Tħejjija:
- Għalli l-fusilli f’borma kbira ilma bil-melħ sakemm isiru al dente.
- Saħħan iż-żejt f’taġen kbir u żid il-basla jew kurrat. Qalli sakemm tirtab u żid it-tewm, il-panċetta u l-bżaru isfar. Qalli għal 2-3 minuti, żid it-tadam, ħawwad sakemm jisħon u neħħi t-taġen minn fuq in-nar.
- Saffi l-għaġin u żidu fit-taġen maz-zalza. Żid ukoll nofs il-kwantità tal-ġbejniet, u melħ u bżar kemm tiggosta. Ħawwad kollox sew sakemm jinkesa l-għaġin.
- Servi l-fusilli bil-weraq tar-rucola fil-wiċċ u roxx ukoll il-kumplament tal-ġbejniet.
