Riċetta: Froġa tal-ġbejniet u asparagu

Asparagus and goats cheese omelette

Ara din ir-riċetta bl-Ingliż: Asparagus and goats cheese (ġbejna) omelette

Biex tagħmel ikla tajba mhux bilfors trid taqla l-kċina. B'din il-froġa tista' tagħmel ikla ħafifa u ta' malajr adattata għal matul il-ġimgħa, li tolqot il-palat bit-togħmiet differenti tal-asparagu mal-ġbejniet u l-bajd.

Preparazzjoni: 15-il minuta

Ħin totali: 35 minuta

Isservi: 4 persuni

Ingredjenti:

  • 1 kuċċarina żejt taż-żebbuġa
  • 1 kurrata, il-parti ċara biss, imnaddfa u mqattgħa rqiq
  • 1 sinna tewm, imqattgħa rqiq
  • 2 bukketti asparagu
  • 4 bajdiet sħaħ
  • 4 abjad tal-bajd
  • 60 g ġbejniet, imfarrkin
  • 1 kuċċarina oriġanu mnixxef
  • Melħ u bżar mitħun frisk

Tħejjija:

  1. Saħħan iż-żejt f’taġen fuq nar moderat. Żid il-kurrata u qalli għal madwar 4 minuti, sakemm tirtab. Żid it-tewma u qalli għal minuta oħra. Neħħi minn fuq in-nar u ħallih jibred għal 5 minuti.
  2. Sadanittant għalli l-asparagus f’kazzola bl-ilma jagħli għal 3 minuti. Saffi u kessaħ taħt l-ilma kiesaħ.
  3. B’ħabbata tal-idejn ħabbat flimkien il-bajd u l-abjad tal-bajd. Żid il-kurrat, l-asparagus, il-ġbejniet u l-origanu. Roxx bil-melħ u l-bżar.
  4. Idlek taġen non-stick ta’ 23 ċm biż-żejt u saħħnu fuq nar moderat.
  5. Ferra’ t-taħlita fit-taġen u llixxa l-wiċċ b’mgħarfa biex l-asparagus u l-ġbejniet jegħrqu fil-bajd. Ħalli l-froġa ssir għal madwar 7 minuti jew sakemm tara li d-dawra ta’ barra qed tiħmar.
  6. Żerżaq il-froġa għal fuq platt u erġa’ aqlibha bil-mod fit-taġen. Kompli sajjar għal 3-4 minuti oħra sakemm il-froġa tagħqad kompletament.
  7. Ħalliha toqgħod għal 10 minuti, imbagħad qattagħha u serviha.

Nota: minflok taqleb il-froġa fuq il-wiċċ l-ieħor biex issir, tista’ tkompli ssajjarha taħt il-grill.

Ippruvajtha din ir-riċetta? Għoġbitek? Ħalli kumment u r-rating tiegħek hawn taħt u agħfas share biex inkomplu nwasslulek iktar riċetti bħal din.