Riċetta: Froġa biċ-ċiċri

Riċetta: Froġa biċ-ċiċri

Din il-froġa moħmija fiha anqas kaloriji mill-frejjeġ moqlijin għax telimina ħafna miż-żejt. Flimkien maċ-ċiċri, li huwa sors tajjeb ta’ fibra u proteini, tista’ tuża ħaxix li jkun fadallek minn ikliet oħrajn u minflok tarmih tirriċiklah f’din il-froġa.

  Ingredjenti

  • 8 bajdiet
  • 150g irkotta
  • 180g tadam, mingħajr żerriegħa u mqatta’ dadi żgħar
  • 1 basla, imqaxxra u mqattgħa rqiq
  • Bott ċiċri ta’ 250g, imsaffi u mlaħlaħ
  • 150g piżelli tal-friża, bil-friża mniżżla
  • ½ bżaru aħmar, imqatta’ rqiq
  • 1 mgħarfa żejt taż-żebbuġa
  • 2 mgħaref tursin frisk, imqatta’ rqiq
  • 1 mgħarfa sagħtar
  • ½ kuċċarina żerriegħa tal-bużbież
  • Niskata melħ
  • Bżar mitħun frisk

 Saħħan il-forn għal temperatura ta’ 180°C. F’taġen saħħan mgħarfa żejt taż-żebbuġa u qalli l-basla sakemm issir trasparenti, imbagħad żid magħha l-bużbież u l-bżaru. Żid ukoll iċ-ċiċri, il-piżelli, it-tadam, u fl-aħħar il-melħ u bżar kemm tiggosta.  Tektek fuq nar baxx għal 10 minuti.

Sadanittant ofsoq u ħabbat il-bajd, żid miegħu l-irkotta u kompli ħabbat. Żid it-tursin u s-sagħtar u ħawwad kollox flimkien. Hekk kif isir il-ħaxix itfgħu mat-taħlita tal-bajd u erġa’ ħawwad sewwa.

Xarrab karta tal-forn bl-ilma biex tirtab u iksi biha l-qigħ ta’ dixx tond b’dijametru ta’ 28ċm. Ferra’ t-taħlita tal-froġa fid-dixx u aħmi għal madwar siegħa jew sakemm tara li l-froġa għaqdet sew u l-wiċċ tagħha ħmar. Din il-froġa tista’ sserviha sħuna kif ukoll kiesħa. Tista’ sserviha ma’ insalata bħala ikla jew tqattagħha u sserviha bħala snack.