Read this in English: Recipe: Chocolate fondant
Deżerta taċ-ċikkulata irreżistibbli li kif taqsamha toħroġ minnha aktar ċikkulata maħlula!
Ħin: 30 minuta
Isservi: 8 persuni
Ingredjenti:
- 300 g ċikkulata skura
- 230 g butir
- 400 g zokkor fin (caster sugar)
- ½ kuċċarina essenza tal-vanilla
- 5 bajdiet, imħabbtin
- 200 g dqiq, mgħarbul
- Niskata melħ
- Mgħarfa butir imdewweb, biex tidlek
- Kawkaw, biex troxx
Tħejjija:
- Saħħan il-forn għal temperatura ta’ 180°C.
- Idlek ħafif bil-butir 8 forom żgħar tal-pudini individwali jew ramekins. Roxx bil-kawkaw u farfar iż-żejjed.
- F’kazzola żgħira dewweb il-butir u ċ-ċikkulata. Neħħih minn fuq in-nar u żid miegħu z-zokkor u l-essenza tal-vanilla. Ħalli t-taħlita tibred ftit.
- Żid il-bajd ftit ftit fit-taħlita u ħabbat kontinwament.
- Żid ukoll id-dqiq u daħħlu bil-mod fit-taħlita flimkien mal-melħ.
- Qassam it-taħlita bejn ir-reċipjenti ppreparati (ara li ma jkollokx aktar minn ⅔ ta’ kull reċipjent mimli).
- Poġġihom fuq tilar u aħmihom għal 12-il minuta eżatt.
- Oħroġhom mill-forn, dawwar sikkina mad-dawra tagħhom u aqlibhom bil-mod fuq platti individwali.
- Servihom fil-pront ma’ krema mħabbta, ġelat jew frott frisk.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
