It-tuffieħ insubuh ħafna drabi bħala ingredjent ma’ riċetti tal-majjal, imma din id-darba se nużaw il-berquq li wkoll jagħmel palat tajjeb f’din ir-riċetta.
Ħin: 40 minuta
Isservi: 4 persuni
Ingredjenti:
- 1 kg flett tal-majjal, maqsum fi 8 biċċiet
- 2 basliet, imqattgħin irqiq
- 6 berquqiet, mingħajr għadma u mqattgħin
- 2 mgħaref żejt veġetali
- Meraq ta’ nofs lumija
- Kuċċarina mustarda
- Kuċċarina zokkor ismar
- 3 mgħaref ġamm tal-berquq
- 100 ml ilma
- ½ kuċċarina trab tal-kannella
- Ross abjad long grain, mgħolli, biex isservi
Tħejjija:
- Saħħan il-forn għal temperatura ta’ 200°C.
- Roxx il-biċċiet tal-flett bil-melħ u l-bżar. Saħħan iż-żejt f’taġen fuq nar għoli u xawwat il-majjal minn kull naħa għal madwar 7 minuti. Poġġih f’dixx u daħħlu fil-forn għal madwar 20 minuta jew sakemm isir sew minn ġewwa. Għatti d-dixx bil-foil u ħalli l-flett joqgħod.
- Sadanittant, fl-istess taġen żid il-basal u qalli sakemm jirtab, imbagħad żid il-mustarda, il-meraq tal-lumi, u melħ u bżar, u tektek sakemm jinġibed il-likwidu. Żid il-berquq u t-trab tal-kannella u kompli tektek sakemm jibda jirtab il-berquq, imbagħad żid iz-zokkor, il-ġamm tal-berquq u l-ilma u tektek sakemm iz-zalza tibda tagħqad.
- Servi l-flett tal-majjal fuq sodda tar-ross biz-zalza fil-wiċċ.
