Għalkemm din ir-riċetta fiha l-piżelli friski, tista’ tuża wkoll tal-friża jew, bħalma naf li hawn bosta li jagħmlu, li tkun xtrajt friska u ffriżajt int stess.
Ħin: 30 minuta
Isservi: 4 persuni
Ingredjenti:
- 400 g għaġin farfalle
- Basla, imqattgħa rqiq
- 4 sinniet tewm, imqattgħin
- 100 g panċetta, imqattgħa rqiq
- 150 g piżelli friska jew tal-friża
- Mgħarfa żejt taż-żebbuġa
- 100 ml inbid abjad
- 250 ml krema singla
- 100g ġobon artab
- 2 mgħaref tursin frisk, imqatta’
- Melħ u bżar mitħun frisk
- 50 g ġobon Parmiġġan maħkuk, biex isservi
Tħejjija:
- Għalli l-għaġin f’borma kbira ilma jagħli bil-melħ sakemm isir al dente.
- Saħħan iż-żejt taż-żebbuġa f’taġen kbir fuq nar moderat u żid il-basla u t-tewm. Qalli sakemm tirtab il-basla u żid il-panċetta, imbagħad żid il-piżelli u ferra’ fuqhom l-inbid. Meta t-taħlita tibda tbaqbaq baxxi n-nar, għatti t-taġen u tektek għal 5 minuti. Żid il-krema u l-ġobon artab, ħawwad sakemm jirtab, roxx bil-melħ u l-bżar u kompli tektek mikxuf sakemm tinġibed ftit il-krema.
- Saffi l-għaġin u żidu fit-taġen flimkien mat-tursin. Ħawwad sew u neħħi minn fuq in-nar. Servi bil-ġobon Parmiġġan maħkuk fil-wiċċ tal-għaġin.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
