Dan id-dipp ta’ ċiċri u tadam imqadded għandu t-togħmiet Mediterranji li minflok jaqtgħulek il-ġuħ, jiftħulek l-aptit. Imma tista’ sserraħ rasek għax nieqes mix-xaħmijiet u huwa nutrittiv ħafna aktar minn dips oħrajn ibbażati fuq il-ġobon.
Ħin: 10 minuti
Isservi: 4 persuni
Ingredjenti:
- Bott ċiċri ta’ 400 g, imsaffi u mlaħlaħ
- 50 g tadam imqadded
- 4 mgħaref żejt taż-żebbuġa
- Ponn weraq tal-ħabaq frisk
- 3 sinniet tewm
- Meraq ta’ nofs lumija
- Bżar mitħun frisk
- Mgħarfa tahini paste, jekk trid
- Gallett, ħobż mixwi, ħobż pita, jew grissini, biex isservi
Tħejjija:
- Poġġi ċ-ċiċri, it-tadam imqadded, il-meraq tal-lumi, it-tewm, it-tahini paste (jekk se tuża), 3 imgħaref miż-żejt taż-żebbuġa u bżar fi proċessur tal-ikel u itħan kollox sew.
- Żomm ftit weraq tal-ħabaq sħiħ u itfa’ l-kumplament mat-taħlita. Itħan ħafif sakemm jitħallat il-ħabaq.
- Poġġi t-taħlita fi skutella u ferrex fuqha l-imgħarfa żejt taż-żebbuġa li jkun fadal.
- Żejjen bil-weraq tal-ħabaq u servi mal-gallett, eċċ.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!
