Din hija l-crème caramel imma bit-togħma tal-larinġ. Riċetta li hija faċli imma tirrikjedi ftit tal-ħin sakemm tistenna t-taħlita toqgħod. Ir-riżultat ikun krema b’togħma pjaċevoli ta’ ċitru li hija ideali bħala deżerta ħafifa wara ikla tajba.
Ħin: siegħa u 20 minuta
Isservi: 8 persuni
Ingredjenti:
- Qxur ta’ 3 larinġiet, maqtugħin strixxi
- 600 ml ħalib
- 600 ml krema doppja
- Bastun tal-kannella
- 2 kikkri zokkor
- 75 ml ilma
- 6 bajdiet
- 3 isfra tal-bajd
- ½ kuċċarina essenza tal-vanilla
- 3 imgħaref port (jekk trid)
Tħejjija:
- Poġġi l-ħalib, il-krema, il-qxur tal-larinġ u l-bastun tal-kannella f’kazzola fuq nar moderat. Saħħan sakemm tara l-bżieżaq jiffurmaw mad-dawra tal-kazzola. Neħħiha minn fuq in-nar u ħalli t-taħlita toqgħod għal siegħa biex joħorġu t-togħmiet.
- F’kazzola żgħira ħallat kikkra miz-zokkor mal-ilma u poġġihom fuq nar baxx. Ħawwad sakemm jinħall iz-zokkor.Għolli n-nar sakemm tagħli, imbagħad ħalliha tagħli mingħajr ma tħawwad sakemm il-likwidu jieħu kulur kannella dehbi; madwar 6-8 minuti. Ferra’ x-xropp bejn 8 ramekins żgħar jew kikkri. Dawwar kull waħda biex ix-xropp jiksi wkoll il-ġnub tar-reċipjent u poġġihom fuq dixx.
- Saħħan il-forn għal temperatura ta’ 160°C.
- Għaddi t-taħlita tal-ħalib minn ġo passatur għal ġo kazzola nadifa. Saħħan sakemm jiffurmaw il-bżieżaq mad-dawra tal-kazzola mingħajr ma tgħalli.
- Sadanittant ħabbat il-bajd sħiħ u l-isfra tal-bajd mal-kikkra zokkor li jkun fadal sakemm ikollok taħlita ħafifa. Żid bil-mod it-taħlita sħuna tal-ħalib, filwaqt li tkompli tħawwad, imbagħad żid l-essenza tal-vanilla u l-port (jekk se tużah).
- Għaddi t-taħlita minn ġo passatur għal ġol-kikkri jew ramekins.
- Ferra’ ilma sħun fid-dixx sakemm tasal sa nofs l-għoli tar-ramekins jew kikkri. Iksi d-dixx bil-foil u aħmi għal 30 minuta, jew skemm sikkina li ddaħħal f’nofs waħda mill-custards toħroġ nadifa.
- Oħroġ ir-ramekins mid-dixx u ħallihom jibirdu għal 30 minuta, imbagħad għattihom u poġġihom fil-friġġ sakemm jiksħu sew.
- Meta tiġi biex isservihom, dawwar sikkina mad-dawra ta’ ġewwa ta’ kull waħda u aqlibhom fuq platt. Ferra’ fuqhom xi karamel li jkun fadal fil-qiegħ.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
