Riċetta oħra ta’ ħelu għal żmien il-Milied. Cookies taċ-ċikkulata li jieħdu dehra kompletament differenti wara li jinħmew. Jekk se tagħtihom bħala rigal ippreżentahom f’kaxxa jew platt b’tema tal-Milied.
Ingredjenti
Għal 50 cookie
- 1 kikkra kokotina, mgħarbula
- 1 ½ kikkri zokkor
- ½ kikkra żejt veġetali
- 4 bajdiet
- 1 kuċċarina essenza tal-vanilla
- 2 kikkri dqiq, mgħarbul
- 2 kuċċarini trab tal-ħami (baking powder)
- 1 kuċċarina trab tal-kafè espresso (instant espresso powder), jekk trid
- ½ kuċċarina melħ
- 1 kikkra zokkor tal-ġelu (icing sugar), mgħarbul
Metodu
- B’mixer tal-elettriku ħabbat flimkien il-kokotina, iz-zokkor u ż-żejt sakemm jiġu qishom għaġina raffa.
- Żid il-bajd waħda waħda u ħabbat għal 30 sekonda kull darba. Żid l-essenza tal-vanilla u ħabbat sew.
- F’bieqja separata ħawwad flimkien id-dqiq, it-trab tal-ħami, il-melħ u l-kafè (jekk se tuża). Żid dawn l-ingredjenti nixfin ftit ftit mat-taħlita taċ-ċikkulata u ħawwad biss sakemm jitħalltu. Geżwer l-għaġina fil-cling film u ħalliha toqgħod fil-friġġ għal 4 sigħat jew tul il-lejl.
- Saħħan il-forn għal temperatura ta’ 180°C. Iksi żewġ tilari bil-kartaforn. Poġġi z-zokkor tal-ġelu f’bieqja wisgħa. Mill-għaġina fforma b’idejk blalen ta’ 2.5ċm kull wieħed. Gerbeb il-blalen fiz-zokkor tal-ġelu u poġġihom fuq it-tilar. Aħmi għal 10-15-il minuta. Ħallihom jibirdu fuq it-tilar għal 2 minuti qabel tpoġġihom fuq gradilja biex jibirdu sew.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.