Riċetta: ‘Chutney’ tal-mustarda u t-tadam

Riċetta: 'Chutney' tal-mustarda u t-tadam

Ġeneralment chutney jirreferi għal tip ta' zalza li tkun magħmula mill-frott jew ħaxix b'varjetà ta' ħwawar, partikolarment il-felfel, biex toħloq togħma ftit taħraq, ftit ħelwa għat-taħwir tal-ikel. F'dan il-każ qegħdin nużaw il-mustarda biex noħolqu togħma simli bi tħejjija ħafna iktar sempliċi u fi żmien qasir.

Dan iċ-chutney tal-mustarda u t-tadam imur tajjeb ħafna mal-laħam, u jekk tixtieq tista' tipprova din ir-riċetta mal-pulpetti tal-laħam imħallat.

Ingredjenti:

  • 1/3 ta' kikkra nbid aħmar bil-ħjiel tal-frott
  • 1/3 ta' kikkra tadam żgħir (cherry tomatoes) mgħaffeġ 
  • 2 imgħaref u nofs ġamm tal-blackberry jew raspberry (aħjar biż-żrieragħ)
  • Kuċċarina bżar iswed mitħun
  • Kuċċarina melħ
  • Kuċċarina trab tat-tewm
  • 1/2 kuċċarina trab tal-basal
  • 1/3 ta' kikkra mustarda

Tħejjija:

  1. Itfa' l-ingredjenti kollha minbarra l-mustarda ġo kazzola u saħħan sakemm it-taħlita tagħqad u ssir uniformi; għaffeġ il-biċċiet tat-tadam ukoll. Dejjem ħawwad.
  2. Neħħi minn fuq in-nar u ħallih jibred.
  3. Xħin it-taħlita tkun birdet, ħawwad il-mustarda u servi.

 Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.