Riċetta: Cheesecake tal-lumi u l-lime

lemon and lime cheesecake

Fix-xhur tas-sajf nużaw ħafna l-lumi fir-riċetti u l-ikel tagħna. Nużawh ħafna mal-ħut, laħam u tiġieġ; imma fuq kollox nużawh mal-ħelu, bħal sorbet u ġelati, minħabba t-togħma friska tiegħu. Bl-istess mod nużaw il-lime, ċitru ieħor li jixbah lil-lumi. F’din ir-riċetta taċ-cheesecake se nużawhom it-tnejn flimkien.

Ħin: 4 sigħat u 15-il minuta

Isservi: 8 persuni

Ingredjenti:

  • 150 g gallettini bħal morning coffee, imfarrkin fin
  • 80 g butir, imdewweb
  • 500 g ġobon artab
  • 150 g zokkor fin (caster sugar)
  • Qoxra maħkuka ta’ lumija
  • 2 mgħaref meraq tal-lumi
  • Qoxra maħkuka ta’ 2 limes
  • 2 mgħaref meraq tal-lime
  • 3 kuċċarini ġelatina
  • 300 ml krema doppja, imħabbta

 

Tħejjija:

  1. Idlek u iksi bil-kartaforn landa tal-qiegħ jinqala’ b’dijametru ta’ 22 ċm .
  2. Ħallat flimkien il-gallettini mfarrkin u l-butir u ferrex it-taħlita fil-qiegħ tal-landa. Agħfas it-taħlita sew sakemm tiġi kumpatta. Poġġi l-landa fil-friġġ.
  3. Sadanittant, b’ħabbata tal-elettriku ħabbat flimkien il-ġobon artab u z-zokkor. Żid il-qxur taċ-ċitru u kompli ħabbat.
  4. F’kazzola żgħira ħallat flimkien il-ġelatina mal-meraq tal-lumi u l-lime. Poġġi l-kazzola fuq nar baxx u saħħan sakemm tinħall il-ġelatina. Ħalli t-taħlita tibred ftit, imbagħad żidha mat-taħlita tal-ġobon u ħabbat kollox flimkien sew. Żid ftit ftit il-krema mħabbta u daħħalha bil-mod (fold in) fit-taħlita tal-ġobon.
  5. Ifrex it-taħlita fuq is-saff tal-gallettini fil-landa, illixxa l-wiċċ u kessaħ għal mill-inqas 5 sigħat jew sakemm tagħqad sew. Żejjen il-wiċċ bi ftit qxur maħkuk tal-lumi u lime u servi.

Ippruvajtha din ir-ricetta ta' cheesecake tal-lumi u l-lime? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know by commenting below and we'll have it translated for you!