Issa li riesaq ukoll Jum il-Missier nibdew naħsbu biex norganizzaw xi ikla. Dan iċ-cheesecake jista’ jkun id-deżerta perfetta. Imma anke jekk mhux se tagħmel ikla sħiħa, cheescake rikk taċ-ċikkulata jagħmel rigal sabiħ u tajjeb ukoll.
Ħin: siegħa u 10 minuti u ħin biex tkessaħ
Isservi: 8 persuni
Ingredjenti:
- 200 g gallettini taċ-ċikkulata
- 100 g butir, imdewweb
- 80 ml ilma kiesaħ
- 5 kuċċarini gelatina
- 500 g ġobon artab
- 125 ml ħalib
- 60 g zokkor tal-ġelu (icing sugar)
- 150 g ċikkulata bajda , imdewba
- 150 g cikkulata skura, imdewba
- 375 ml krema doppja, imħabbta sakemm titla’
- 100 g ċikkulata tal-ħalib maħkuka, jew kawkaw, għall-wiċċ
Tħejjija:
- Idlek landa ta’ 24 ċm tal-qiegħ jinqala’ bil-butir u iksi l-qiegħ bil-kartaforn.
- Itħan il-gallettini sakemm isiru frak fin. Żid magħhom il-butir imdewweb u ħallat sakemm jixxarrab il-frak tal-gallettini. Aqleb it-taħlita fil-landa ppreparata u agħfas it-taħlita sew mal-qiegħ b’mgħarfa sakemm tiġi kumpatta. Poġġi l-landa fil-friġġ għal aktar tard.
- Poġġi l-ilma fi skutella jew kikkra u roxx fuqu l-ġelatina. Ħalliha għal ftit minuti sakemm tiġi qisha sponża, imbagħad ħollha banjumarija sakemm terġa’ ssir likwida. Ħalli l-ġelatina tibred.
- Sadanittant b’mixer ħabbat flimkien il-ġobon artab, il-ħalib u z-zokkor sakemm ikollok taħlita lixxa. Żid il-ġelatina u ħabbat sakemm titħallat kompletament.
- Aqsam it-taħlita tal-ġobon fi kwantitajiet indaqs bejn żewġ skutelli. Ma’ skutella minnhom żid iċ-ċikkulata mdewba l-bajda u ħallat sew; u mat-tieni skutella żid iċ-ċikkulata skura u ħallat sew ukoll.
- Aqsam ukoll il-krema mħabbta bejn iż-żewġ skutelli taċ-ċikkulata u daħħalha bil-mod fit-taħlitiet.
- Ferra’ t-taħlita taċ-ċikkulata skura fuq il-gallettini fil-landa, illixxa l-wiċċ u ffriża għal 15-il minuta sakemm tagħqad ftit. Ifrex bil-mod it-taħlita taċ-ċikkulata bajda fuq dik skura u erġa’ llixxa l-wiċċ. Għatti l-landa u poġġi fil-friġġ għal mill-inqas 6 sigħat jew tul il-lejl.
- Biex isservi, neħħi ċ-cheescake mil-landa għal fuq platt kbir ċatt u roxx il-wiċċ biċ-ċikkulata maħkuka jew kawkaw mgħarbul.
Ippruvajtha din ir-ricetta taċ-cheesecake? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
