Read this in English: Recipe: Grouper (Ċerna) in a tomato and basil sauce
Is-sajf reġa’ magħna u miegħu jiżdied il-konsum tal-ħut. Jibda wkoll l-istaġun tat-tadam u fil-ġonna jew f’xi qasrija nkabbru wkoll xi ftit ħabaq. B’dawn it-tliet ingredjenti nistgħu nagħmlu ikla sempliċi tipikament Mediterranja.
Ħin: 30 minuta
Isservi: 4 persuni
Ingredjenti:
- 3 mgħaref żejt taż-żebbuġa
- 4 porzjonijiet flett taċ-ċerna (madwar 800 g-1 kg b’kollox)
- Niskata melħ oħxon
- Bżar mitħun frisk
- 8 tadamiet, mingħajr żerriegħa u mqattgħin dadi żgħar
- 6 sinniet tewm, imqattgħin
- Ponn ħabaq frisk, imqatta’
Tħejjija:
- Saħħan iż-żejt taż-żebbuġa fuq nar moderat u xawwat il-biċċiet tal-ħut fuq iż-żewġ naħat sakemm jibdlu l-kulur biss. Neħħihom mit-taġen bil-mod biex ma jitfarrkux u poġġihom fuq platt.
- Fl-istess taġen qalli t-tewm għal ftit sekondi, imbagħad żid it-tadam. Baxxi n-nar u kompli tektek it-tadam sakemm jibda jirtab. Erġa’ poġġi l-biċċiet taċ-ċerna fit-taġen, roxx bil-melħ u l-bżar u żid il-ħabaq. Tektek u dawwarhom darba sakemm il-ħut isir minn ġewwa u z-zalza tibda tinġibed.
- Servi fil-pront ma’ insalata ħadra u ħobż frisk.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.