Read this recipe in English: Cenci – a traditional Carnival sweet from Tuscany
Iċ-cenci huwa ħelu li jiġi ppreparat fir-reġjun tat-Toskana għal żmien il-karnival, għalkemm issibu wkoll magħmul madwar l-Italja kollha b’ismijiet differenti. Cenci tfisser 'ċraret' (rags) u dan għax il-ħelu huwa magħmul b'daqsijiet u forom differenti minn xulxin bħall-biċċiet taċ-ċraret.
Ħin: 35 minuta, u 30 minuta biex tkessaħ
Ingredjenti:
- 300 g dqiq
- 2 bajdiet
- 80 g zokkor tal-ġelu (icing sugar); u aktar biex troxx
- 2 mgħaref żejt taż-żebbuġa
- 1 mgħarfa brandy jew grappa
- Żejt biex taqli
Tħejjija:
- Ħabbat il-bajd u miegħu kompli ħabbat iż-żejt taż-żebbuġa u l-brandy jew grappa.
- Żid iz-zokkor, imbagħad għarbel fuqhom id-dqiq.
- Għaqqad f’għaġina u aħdimha sakemm tillixxa. Geżwer l-għaġina f’borża u ħalliha tistrieħ fil-friġġ għal 30 minuta.
- Iftaħ l-għaġina fi ħxuna ta’ 3 mm u b’rota tal-għaġina (pastry wheel) aqta’ strixxi ta’ madwar 15-il ċm tul u 3 ċm wisa’. Bl-istess rota agħmel qatgħa fin-nofs tat-tul ta’ kull strixxa mingħajr ma tasal sat-trufijiet, biex ikollok bħal xaqq f’kull biċċa.
- Saħħan ammont sostanzjali ta' żejt f’kazzola biex taqli l-għaġina "deep fry". Iż-żejd ikun saħan biżżejjed meta titfa’ biċċa għaġina nejja żgħira fih u tibda tfexfex mill-ewwel u tiħmar fi ftit sekondi.
- Itfa’ l-biċċiet tal-għaġina ftit ftit u aqlihom sakemm isiru ta’ lewn dehbi. Dawwarhom bil-mod darba waqt is-sajran. Tellagħhom miż-żejt u poġġihom fuq karti tal-kċina biex joqtru miż-żejt żejjed.
- Għarbel ftit zokkor tal-ġelu fuqhom u servihom.
Ippruvajtha din ir-riċetta? Għoġbitek? Għidilna billi tħalli kumment u r-rating tiegħek hawn taħt u agħfas share.