Riċetta: ‘Cassoulet’ tal-majjal u l-fażola

Pork and beans cassoulet Riċetta Cassoulet tal-majjal u fażola

 Il-cassoulet huwa platt xitwi bil-laħam tal-majjal, bacon u fażola bajda li oriġina min-naħa ta’ isfel ta’ Franza. Dan il-platt ħa ismu mir-reċipjent tal-fuħħar fond u tond li jissajjar fih.

Ħin: sagħtejn u 40 minuta

Isservi: 6 persuni

Ingredjenti:

  • 400 g flett tal-majjal
  • Żejt taż-żebbuġa
  • Melħ oħxon u bżar mitħun frisk
  • 400g zalzett imħawwar (jaħraq jew tat-tewm)
  • 125 g bacon taż-żaqq, mingħajr ġilda u mqatta’
  • Basla, imqattgħa rqiq
  • 2 karrotti, imqattgħin roti
  • 2 żkuk tal-karfus, imqattgħin
  • 2 sinniet tewm, misħuqin
  • 400 g polpa tat-tadam
  • 2 bottijiet fażola bajda żgħira bħal cannellini jew haricot, imsaffija u mlaħalħa
  • 600 ml stokk tat-tiġieġ
  • 2 werqiet tar-rand
  • ½ bżaru tal-filfel żgħir, imqatta’ rqiq
  • 100 g frak tal-ħobż abjad frisk

Tħejjija:

  1. Saħħan il-forn għal temperatura ta’ 160°C. Ipprepara dixx tal-forn fond u bil-għatu (casserole).
  2. Qatta’ l-flett tal-majjal f’biċċiet ħoxnin.
  3. Saħħan kuċċarina żejt f’taġen kbir fuq nar moderat u aqli l-biċċiet tal-flett miż-żewġ naħat sakemm jieħdu l-kulur, imbagħad poġġihom fid-dixx tal-forn.
  4. Kif tlesti l-flett aqli z-zalzett sakemm jieħdu l-kulur u żidu mal-flett. Żid aktar żejt jekk ikun hemm bżonn.
  5. Fl-istess taġen qalli l-basla u l-bacon għal 2 minuti; żid it-tewm, il-karfus u l-karrotti u kompli qalli għal 5 minuti oħra filwaqt li tħawwad sikwit.
  6. Żid it-tadam, il-fażola u l-istokk, il-weraq tar-rand u l-filfel. Roxx b’niskata melħ u bżar mitħun frisk.
  7. Saħħan it-taħlita u ferragħha fid-dixx fuq il-flett u z-zalzett. Aħmi fil-forn għal sagħtejn.
  8. Ftit ħin qabel toħorġu mill-forn, saħħan 2 mgħaref żejt f’taġen kbir fuq nar medju u aqli l-frak tal-ħobż sakemm isir lewn id-deheb. Poġġih fuq karta tal-kċina biex tixrob iż-żejt żejjed.
  9. Servi l-cassoulet bil-frak tal-ħobż imferrex fil-wiċċ.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!