Ikla kompluta li fiha minn kollox: taħlita ta’ laħam taċ-ċanga u ħaxix servuti fuq sodda tar-ross.
Ħin: 40 minuta
Iservi: 4 persuni
Ingredjenti:
- 3 imgħaref żejt tal-ward tax-xemx (sunflower oil)
- 250 g spraġ (asparagus), bil-parti l-iebsa maqtugħa u mqatta’djagonali f’biċċiet ta’ 3 ċm
- 500 g falda taċ-ċanga (flank), maqsuma min-nofs għat-tul, imbagħad strixxi għall-wisa’
- Basla kbira, maqsuma min-nofs għat-tul u mqatta’ strixxi rqaq
- Bżaru aħmar ħelu, imnaddaf u mqatta’ fi strixxi ta’ 1 ċm wisa’ u 3 ċm tul
- 2 imgħaref dqiq tal-qamħirrun (cornflour), maħlul fi 3 imgħaref ilma
- 400 g ross mit-twil (long grain)
Għaz-zalza:
- 3 imgħaref soy sauce
- Kuċċarina ġinġer frisk, imqaxxar u mqatta’ rqiq
- Sinna tewm, misħuqa
- Kuċċarina żejt tal-ward tax-xemx (sunflower oil)
- Bżar felfel, mingħajr żerriegħa u mqatta’ rqiq
Tħejija:
- Ismot l-ispraġ għal 2 minuti f’kazzola bl-ilma jagħli. Saffi u laħlaħ bl-ilma kiesaħ.
- Għalli r-ross f’kazzola b’litru ilma sakemm jinxtorob l-ilma; madwar 20 minuta.
- Sadanittant, fi skutella żgħira ħallat flimkien l-ingredjenti kollha taz-zalza u warrabha għal aktar tard.
- Saħħan mgħarfa miż-żejt f’wok jew kazzola baxxa b’qiegħ oħxon fuq nar għoli. Żid l-ispraġ u qalli għal 2 minuti jew sakemm jaqbad jiħmar. Tellgħu b’mgħarfa mtaqqba u poġġih fuq platt għas-sħana.
- Saħħan mgħarfa oħra żejt u aqli l-biċċiet taċ-ċanga ftit ftit sakemm jieħdu l-kulur minn barra u jkunu għadhom ftit roża minn ġewwa.
- Erġa’ itfa’ l-kumplament taċ-ċanga, żid il-basla u ħawwad għal 2 minuti.
- Żid ukoll il-bżar aħmar ħelu u ħawwad kollox flimkien għal 2 minuti oħra sakemm il-bżar jibda jidbiel.
- Żid id-dqiq tal-qamħirrun maħlul fl-ilma u z-zalza ppreparata u ħawwad għal 2 minuti sakemm il-likwidu jibda jagħqad.
- Fl-aħħar żid ukoll l-ispraġ u ħawwad kollox sew biex jinkesa biz-zalza. Servi fuq sodda tar-ross.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!