Il-ħaxix, bħal bżar, qarabagħli u brunġiel, normalment nimlewh bl-ikkapuljat ta’ laħam differenti jew ross. Fir-riċetta ta’ bżar ħelu din id-darba l-mili sej kun bl-għaġin.
Ħin: 45 minuta
Isservi: 4 persuni
Ingredjenti:
- 4 bżariet ikkuluriti, maqsumin min-nofs għat-tul u mnaddfin
- 175 g għaġin xgħir
- Mgħarfa żejt taż-żebbuġa
- 2 sinniet tewm, imqattgħin
- Basla żgħira, imqattgħa rqiq
- 2 zalzettiet tal-Malti, jew zalzett ieħor, mingħajr qoxra
- 250 g mozzarella
- 300 ml passata tat-tadam
- Kuċċarina origanu mnixxef
- Melħ u bżar mitħun frisk
- 100 g weraq tal-ispinaċi , jew spinaċi tal-friża
Tħejjija:
- Saħħan il-forn għal temperatura ta’ 200°C. idlek dixx tal-forn bi ftit żejt u poġġi n-nofsijiet tal-bżar ħdejn xulxin.
- Għalli l-għaġin f’borma ilma bil-melħ sakemm isir al dente u saffih.
- Saħħan iż-żejt f’taġen kbir u żid il-basla; qalli sakemm issir trasparenti u żid il-laħam taz-zalzett u t-tewm, u kompli qalli sakemm jieħu kulur kannella. Żid iz-zalza, melħ u bżar, u l-origanu. Tektek għal 5 minuti, imbagħad żid il-weraq tal-ispinaċi u ħawwad sakemm jibda jidbiel. Żid l-għaġin u nofs il-mozzarella u ħawwad kollox flimkien.
- Imla l-bżar bit-taħlita u roxx il-kumplament tal-mozzarella fil-wiċċ.
- Ferra’ kikkra ilma fid-dixx u aħmi għal 20-25 minuta jew sakemm jibda jirtab il-bżar.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
