Riċetta: Brunġiel mimli bix-xgħir, ‘farro’ jew ‘spelt’

Picture taken from http://ramandaspicypassion.blogspot.com/2013/11/stuffed-aubergines-brungiel-mimli.html

Hawn taħt tista' ssib riċetta tal-brunġiel mimli daqsxejn b'mod mhux tas-soltu, għax minflok ross se nużaw xgħir (barley), farro jew spelt li ma jintużawx daqshekk spiss fil-kċina Maltija. Din ir-riċetta hi ispirata minn riċetta tradizzjonali Torka, u t-togħma delizjuża tiddependi ħafna mill-fatt li dan il-platt idum itektek bil-mod għal ħafna ħin.

Barra minn hekk, din ir-riċetta tiġi anke itjeb jekk tħejjijha minn ġurnata qabel. Tista' ssajjar il-brunġiel u l-mili minn qabel, imbgħad tista' timla l-brunġiel u ssajru, u meta jkun lest ħallih joqgħod u żommu fil-friġġ. Qabel ma sservih, kemm toħorġu mill-friġġ u tħallih joqgħod sakemm jilħaq it-temperatura tal-kamra.  

Preparazzjoni: 30 minuta

Ħin totali: Sagħtejn (Siegħa u nofs minnhom itektek waħdu)

Isservi: 6 persuni

Enerġija: kull porzjon fih 194 kalorija

 

Ingredjenti: 

  • 700g brunġiel (6 zgħar jew 3 kbar)
  • Kikkra xgħir (barley), farro jew spelt misjur 
  • 700g tadam (6 zgħar jew 3 kbar) neħħilhom il-qoxra u qatta' (ikklikja hawn għal metodu)
  • Basla kbira, mqatta' rqiqa
  • 6 sinniet tewm maħkuk
  • 1/4 kikkra tursin imqatta' fin
  • 2 imgħaref xift (dill) imqatta' fin
  • 2 imgħaref ħabaq (basil) imqatta' fin
  • Bżar iswed maħkuk frisk, skont il-gosti 
  • Melħ skont il-gosti
  • 1/4 kikkra żejt taż-żebbuġa Carapelli
  • 1/4 kikkra ilma
  • 2 1/2 kuċċarini zokkor
  • 2 imgħaref meraq tal-lumi
  • Ftit iktar tursin mqatta' għat-tiżjin

Tħejjija:

  1. Saħħan il-forn għal 230C.
  2. Iksi folja tal-ħami bil-foil u dellek ftit żejt taż-żebbuġa.
  3. Aqsam il-brunġiel għat-tul, iżda mingħajr ma taqsam il-qoxxra. Poġġih fuq folja tal-ħami u sajjar għal madwar 15-20 minuta, skont id-daqs, sakemm il-qoxra tibda tinxtorob.
  4. Neħħi l-brunġiel mill-forn u poġġih ġo passatur ġos-sink, bil-qasma tħares 'l isfel, u ħalli l-meraq joħroġ minnu għal madwar 15-il minuta.
  5. Sadanittant, saħħan 2 imgħaref żejt taż-żebbuġa ġo taġen kbir mgħotti fuq nar medju u aqli l-basal għal madwar 8 minuti sakemm jirtab.
  6. Żid ftit melħ u t-tewm. Sajjar għal madwar 30 sekonda sakemm jibda jfuħ. 
  7. Żid it-tadam, il-ħxejjex aromatiċi, ftit melħ skont il-gosti, kuċċarina zokkor u x-xgħir (barley), farro jew spelt misjur. Warrab ġo skutella kbira.
  8. Dawwar il-brunġiel u poġġih fit-taġen, bil-qasma tħares 'il fuq, u raxxax ftit melħ. 
  9. Iftaħ il-qasma u imla l-brunġiel bil-mili. Jekk jibqagħlek mit-taħlita, itfa' fuq il-brunġiel.
  10. Ħallat il-kumplament taż-żejt taż-żebbuġa, zokkor, ilma u meraq tal-lumi u raxxax fuq il-brunġiel.
  11. Għatti t-taġen u sajjar fuq nar baxx għal madwar siegħa jew siegħa u nofs. Kultant xarrab il-bunġiel bil-likwidu li jkun hemm fit-taġen, u żid ftit iktar ilma jekk ikun nixef (imma mhux suppost).
  12. Fl-aħħar il-brunġiel suppost ikun niżel ħafna u z-zalza tkun saret magħquda; xerred iz-zalza fuq il-brunġiel b'imgħarfa.
  13. Ħalli kollox jibred u joqgħod, raxxax ftit tursin u servi fit-temperatura tal-kamra.