Il-brownies kienu vvintati fl-Istati Uniti lejn l-aħħar tas-seklu dsatax u, tista’ tgħid, huma t-triq tan-nofs bejn il-kejk u l-cookie. Jissejħu brownies, ovvjament, minħabba l-kulur kannella taċ-ċikkulata li huwa l-ingredjent prinċipali tar-riċetta. Insibu verżjoni oħra li hi magħmula biz-zokor ismar imma mingħajr ċikkulata li tissejjaħ blondie. Il-brownies huma popolari ħafna għal mat-te jew kafè, jew bħala deżerta akkumpanjati bil-krema jew ġelat
Ingredjenti
• 200g ċikkulata tat-tisjir skura, imkissra
• 200g butir, imqatta’ dadi
• 3 bajdiet
• 2 isfra tal-bajd
• 270g zokkor fin (caster sugar)
• 115g dqiq, mgħarbul
• 35g kokotina, mgħarbula
Saħħan il-forn għal temperatura ta’160°C. Idlek dixx ta’ 16ċm x 26ċm bi ftit butir maħlul u iksih bil-karta tal-forn. Dewweb iċ-ċikkulata u l-butir banjumarija u ħawwad b’mgħarfa tal-metall xotta. Ħalli ċ-ċikkulata tibred ftit. Ħabbat sewwa l-bajd u l-isfra tal-bajd u żidhom maċ-ċikkulata bierda. Ħallat iz-zokkor u d-dqiq flimkien u żid, filwaqt li tħawwad bil-mod, mat-taħlita taċ-ċikkulata . Ferra’ t-taħlita fid-dixx u aħmi fil-forn għal 45-50 minuta. Tħallix il-brownie żżejjed fil-forn għax ikollok riżultat xott. Ħalli l-brownie fid-dixx għal diversi sigħat jew anke tul il-lejl qabel toħroġha mid-dixx biex tqattagħha.
