Id-dehra ta’ dawn il-brownies tiġbdek, u meta dduqhom żgur ma tiddiżappuntax ruħek bil-palat kremuż tal-ġobon u bil-biċċiet taċ-ċikkulata fis-saff tan-nofs!
Preparazzjoni: 25 minuta
Ħin totali: 55 minuta, u sagħtejn biex tkessaħ
Kwantità: 16
Ingredjenti:
Għas-saff tal-ġobon:
- 250 g ġobon artab bħal Philadelphia, temperatura tal-kamra
- 55 g zokkor
- Bajda
- 150 g chocolate chips skuri
Għall-brownie:
- 65 g butir
- 150 g chocolate chips skuri
- 110 g zokkor
- 2 bajdiet
- 85 g dqiq
- ½ kuċċarina trab tal-ħami (baking powder)
- Niskata melħ
Tħejjija:
- Saħħan il-forn għal temperatura ta’ 180°C. Idlek landa kwadra ta’ 23 ċm bil-butir u iksi l-qiegħ bil-kartaforn.
- Fi skutella ħabbat flimkien il-55 g zokkor u l-ġobon artab, imbagħad żid il-bajda u kompli ħabbat sakemm ikollok taħlita lixxa. Żid 150 g chocolate chips u daħħalhom fit-taħlita b’mgħarfa.
- Dewweb il-butir u l-150 g l-oħra chocolate chips flimkien fi skutella banjumarija, u ħawwad sakemm jitħalltu sew.
- Neħħi l-iskutella minn fuq in-nar u żid il-110 g zokkor u ż-żewġ bajdiet, u kompli ħabbat.
- Għarbel flimkien id-dqiq, it-trab tal-ħami u l-melħ, u żidhom mat-taħlita. Ħawwad kollox flimkien sakemm ikollok taħlita lixxa.
- Ferra’ nofs din it-taħlita fil-landa ppreparata. Ifrex it-taħlita tal-ġobon fuqha u kompli ferra’ l-kumplament tat-taħlita fuq dik tal-ġobon. B’sikkina dawwar it-taħlitiet differenti flimkien biex toħloq effett ta’ rħam.
- Aħmi għal 25-30 minuta jew sakemm il-ġnub jinġibdu minn mal-landa. Ħalli l-kejk jiksaħ fil-landa stess u poġġih fil-friġġ għal sagħtejn, imbagħad aqilbu u qattgħu fi 12 jew 16-il biċċa.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!