Riċetta: Brownies b’saff tal-menta

Minty brownies

Read this in English: Recipe: Minty brownies

Kulħadd xi darba jew oħra kellu l-okkażjoni jduq it-togħmiet taċ-ċikkulata, speċjalment dik skura, mal-menta. Il-kumbinazzjoni taċ-ċikkulata b’togħma ħelwa-morra ma’ dik tal-menta ħelwa-taħraq (friska) hija irreżistibbli!

Ħin: siegħa u 45 minuta, u ħin biex tkessaħ

Kwantià: 30

Ingredjenti:

Għall-brownie:

  • 125 g butir
  • 75 g dqiq
  • 125 g ċikkulata skura, imkissra
  • 250 g zokkor
  • ½ kuċċarina essenza tal-vanilla
  • Niskata melħ
  • 2 bajdiet

Għas-saff tal-menta:

  • 25 g butir, temperatura tal-kamra
  • 100 g zokkor tal-ġelu (icing sugar)
  • 1½ mgħarfa krema doppja
  • ½ kuċċarina essenza tal-menta
  • Ftit qtar kulur aħdar

Għall-glaze taċ-ċikkulata:

  • 100 g cikkulata skura, imkissra
  • 2 mgħaref krema doppja

 

Tħejjija:

  1. Saħħan il-forn għal temperatura ta’ 160°C. Idlek landa kwadra b’ġenb ta’ 23 ċm (preferibbilment bil-qiegħ jinqala’ biex tkun aktar faċli li toħroġ il-brownie) u iksiha bil-kartaforn.
  2. Biex tagħmel il-brownie: Dewweb u l-butir u ċ-ċikkulata banjumarija. Neħħihom minn fuq in-nar, żid iz-zokkor u l-essenza tal-vanilla u ħawwad. Ż id il-bajd waħda waħda u ħabbat sew, b’mgħarfa tal-injam jew ħabbata tal-bajd, kull darba. Fl-aħħar żid id-dqiq u l-melħ u ħabbat sakemm ikollok taħlita lixxa u tleqq. Ferra’ t-taħlita fil-landa ppreparata u aħmi għal 25-30 minuta jew sakemm il-brownie tibda tinġibed minn mal-ġenb tal-landa u meta ddaħħal stikka fin-nofs tal-brownie toħroġ nadifa. Ħalliha tibred kompletament fil-landa stess.
  3. Sadanittant agħmel is-saff tal-menta: B’ħabbata tal-elettriku ħabbat il-butir, iz-zokkor tal-ġelu, il-krema u l-essenza sakemm ikollok taħlita lixxa b’konsistenza li tiddellek. Jekk tkun xi ftit iebsa żid ftit aktar krema u erġa’ ħabbat. Fl-aħħar żid il-kulur ftit ftit, filwaqt li tkompli tħabbat, sakemm ikollok il-kulur mixtieq. Ifrex it-taħlita tal-menta fuq il-brownie bierda u daħħal il-landa fil-friġġ għal kwarta.
  4. Sadanittant ipprepara l-glaze tal-wiċċ: Dewweb iċ-ċikkulata banjumarija, żid il-krema u ħallathom sew flimkien. Neħħi t-taħlita minn fuq in-nar u berridha ftit. Ifrex il-glaze fuq is-saff tal-menta. Kessaħ fil-friġġ għal mill-inqas 30 minuta, sakemm jagħqad il-wiċċ.
  5. Oħroġ il-brownies mil-landa u aqsam f’porzjonijiet ta’ madwar 2.5 ċm kull waħda.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.