Riċetta: Braġjoli tat-tiġieġ bil-mozzarella

By: Fatima Eltham

Dawn il-braġjoli tat-tiġieġ miksijin bil-bacon u mimlijin bil-bżar aħmar u mozzarella affumikata jagħmlu taħlita ta’ kuluri u togħmiet kuntrastanti: il-bacon mielaħ, il-bżar ħelu u t-togħma distinta tal-mozzarella affumikata. Platt li tista’ tipprepara l-ġurnata ta’ qabel u tkessaħ fil-friġġ qabel issajru.

Ħin: 50 minuta

Isservi: 4 persuni

Ingredjenti:

4 isdra tat-tiġieġ (150g il-waħda)
60ml żejt taż-żebbuġa
1 mgħarfa weraq tal-origanu frisk, imqatta’; jew kuċċarina origanu mnixxef
2 mgħaref tursin frisk, imqatta’
2 sinniet tewm, imqatta’ rqiq
16-20 lista bacon taż-żaqq, mingħajr il-ġilda
250g mozzarella affumikata bħal scamorsa
300g bżar aħmar (capsicum)
Melħ u bżar mitħun frisk

Tħejjija:

Saħħan il-forn għal 200°C.
Poġġi l-bżar aħmar fuq dixx u ixwi sakemm il-qoxra tiegħu taqbad tiswied u tintnefaħ. Dawwar il-bżar kull tant ħin. Poġġi l-bżar f’borża tal-plastik tingħalaq (il-fwar jgħin biex jitqaxxar aħjar) għal 10 minuti. Qaxxar ir-rita, neħħi z-zokk u ż-żerriegħa u qattgħu fi strixxi.
Baxxi t-temperatura tal-forn għal 180°C. Poġġi l-isdra tat-tiġieġ bejn żewġ biċċiet cling film u sabbathom bil-lembuba sakemm jinfetħu għal ħxuna ta’ 2 ċm. Ħallat mgħarfa żejt taż-żebbuġa mat-tewm, it-tursin u l-origanu f’bieqja u żid il-melħ u l-bżar.
Poġġi 4-5 biċċiet bacon, waħda mrikkba ftit fuq l-oħra, fuq il-wiċċ li qed taħdem fuqu. Poġġi s-sider tat-tiġieġ fuq il-bacon u idlek bi ftit żejt taż-żebbuġa. Poġġi saff bżar aħmar mixwi u saff mozzarella fuq kull sider.
Ibda rrombla s-sider bil-bacon b’kollox min-naħa l-qasira u ssikka kemm tista’. Orbot ir-romblu bl-ispag. Daħħal il-braġjoli fil-friġġ għal kwarta.
Saħħan il-kumplament taż-żejt taż-żebbuġa f’taġen fuq nar moderat u dawwar il-braġjoli fih sakemm jieħdu l-kulur, madwar 3-4 minti. Ittrasferixxi l-braġjoli għal dixx tal-forn u aħmi għal 15-il minuta sakemm isiru minn ġewwa u l-mozarella tkun inħallet.
Servi sħun ma’ insalata jew patata maxx.