Read this in English: Recipe: Walnut balls
Snowballs li żgur mhux se tissotta lil ħadd bihom għax minflok titfagħhom f’ħalqek. Blalen bil-ġewż li ma tiqafx tiekol qabel jispiċċaw, għalhekk nirrakkomandalek li tirdoppja l-kwantità tar-riċetta mill-ewwel. Tista’ tuża ġellewż jew ġewż pekan (pecan nuts) minflok il-ġewż, jew, jekk se tirdoppja, tagħmel nofs mod u nofs mod ieħor.
Ingredjenti
Għal 20 ballun
- 1 kikkra dqiq
- 1 ½ kikkra ġewż, imqatta’ rqiq
- 3 mgħaref zokkor
- ½ kuċċarina essenza tal-vanilla
- 115g butir, temperatura tal-kamra
- Niskata melħ
- Zokkor tal-ġelu, biex tiksi (madwar kikkra)
Metodu
- Saħħan il-forn għal temperatura ta’ 150°C. Iksi tilar bil-kartaforn.
- Ħallat flimkien l-ingredjenti xotti – id-dqiq, il-ġewż, il-melħ u z-zokkor – f’bieqja kbira. Żid magħhom l-essenza tal-vanilla. Qatta’ l-butir f’biċċiet żgħar u żid mal-ingredjenti xotti. Ħawwad b-idejk sakemm tgħaqqad l-ingredjenti f’taħlita raffa. Ifforma fi blalen daqs ta’ ġewża u poġġihom fuq it-tilar. Ħalli spazju ta’2ċm bejn wieħed u ieħor.
- Aħmi għal 35 minuta. Meta jibirdu imma jkunu għadhom sħan gerbibhom fiz-zokkor tal-ġelu. Ħallihom jiksħu u erġa’ dawwarhom fiz-zokkor tal-ġelu.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.