Tixtieq li ssib xi ħaġa ħelwa u tajba li tista' tgawdiha mingħajr sens ta' ħtija? Dawn il-blalen biċ-ċikkulata morra u l-berries huma ideali għax, barra li huma tajbin fit-togħma, kemm iċ-ċikkulata morra kif ukoll il-berries huma sustanzjużi ħafna bi ftit kaloriji (sakemm ma tesaġerax). Biss biss iċ-ċikkulata morra hija sors tajjeb ta' manjesju u ta' minerali essenzjali oħrajn, fosthom il-kalċju, iż-żingu, il-ħadid u l-potassju, kif ukoll diversi tipi ta' vitamini B, il-proteina, il-fibra u nutrijenti oħrajn. Min-naħa l-oħra il-berries huma magħrufin bħala 'superfood' minħabba l-benefiċċju kbir tagħhom. Interessanti li dawn iż-żewġ ingredjenti huma meqjusa li jtellgħu l-moral u b'hekk huma ideali biex iqajmuk meta tħossok imdejjaq.
Tagħmel: madwar 30 ballun.
Ingredjenti:
- 1/4 ta' kikkra żejt tal-ġewż tal-Indi (coconut oil) organiku
- 1/2 kikkra kawkaw morr (raw cocoa)
- 3 imgħaref zokkor tal-ġewż tal-Indi (coconut sugar)
- Kuċċarina vanilja, jekk trid
- 1/2 kikkra berries imħalltin tal-friża
Tħejjija:
- Poġġi ż-żejt tal-ġewż tal-Indi u z-zokkor ġo kazzola fuq nar bati u ħawwad sakemm kollox jinħall.
- Żid il-kawkaw u l-vanilja u ħawwad sew sakemm ma jkunx hemm iktar boċċi fit-taħlita.
- Poġġi l-berries, waħda waħda, ġot-taħlita. Uża kuċċarina biex tiksi kull berry sew qabel tpoġġiha fuq tilar biex toqgħod.
- Kompli hekk sakemm tiksi l-berries kollha, imbagħad erġa' agħti passata oħra sabiex kull berry jkollha żewġ passati, jew sakemm taħli ċ-ċikkulata kollha.
Għoġbitek din ir-riċetta? Għidilna x'taħseb billi tħalli kumment hawn taħt u jekk jogħġbok agħmel like u share biex inkomplu nwasslulek riċetti li jogħġbuk.
