Read this recipe in English: Baked salted cod with potatoes, olives and eggs
Għalkemm m'għadux daqstant popolari fil-kċina Maltija tal-llum, il-bakkaljaw għadek issibu għal bejħ fis-suq ta' Marsaxlokk. Jekk għadek qatt ma ppruvajtu, din ir-riċetta għal-bakkaljaw moħmi bil-patata, żebbuġ u bajd mgħolli kapaċi ssir wieħed mill-platti favoriti tiegħek.
Ħin totali: siegħa u 45 minuta, u 24 siegħa biex ixxarrab il-bakkaljaw
Isservi: 4 persuni
Ingredjenti:
- 500 g bakkaljaw immellaħ, mingħajr ġilda
- Ħalib sħun, jekk ikun hemm bżonn
- 700 g patata, imqaxxra
- 6 mgħaref żejt taż-żebbuġa
- 2 basliet, imqattgħin irqiq għat-tul
- 2 sinniet tewm, imqatta’ rqiq
- ½ kikkra tursin frisk, imqatta’
- 20 żebbuġa sewda fiż-żejt
- 2 bajdiet mgħollijin ibsin, imqattgħin roti
- Bżar mitħun frisk
Tħejjija:
- Poġġi l-bakkaljaw f’bieqja, għattih bl-ilma, għattih u poġġih fil-friġġ għal mill-inqas 24 siegħa.
- Saffi l-bakkaljaw, laħalħu taħt l-ilma kiesaħ u poġġih f’kazzola. Għattih bl-ilma u poġġih fuq nar moderat sakemm jibda jagħli. Baxxi n-nar u tektek għal 20-25 minuta jew sakemm jibda jitfarrak meta tagħfsu b’furketta.
- Saffi l-bakkaljaw mill-ilma u ħallih jibred. Farrak il-bakkaljaw b’idejk u neħħi xi xewk jew biċċiet ibsin li jista’ jkun fih. Duqu u, jekk ikun għadu mielaħ iżżejjed, erġa’ xarrbu fil-ħalib għal nofs siegħa, imbagħad saffih.
- Poġġi l-patata f’kazzola, għattiha bl-ilma u għalliha fuq nar għoli għal 10-15-il minuta jew sakemm tidħol furketta fiha. Saffiha mill-ilma u, meta tibred, qattagħha roti ta’ ½ ċm ħxuna.
- Saħħan 2 mgħaref żejt taż-żebbuġa f’taġen kbir fuq nar moderat.
- Żid il-basal u qalli għal 6 minuti sakemm jibda jieħu l-kulur.
- Żid it-tewm u qalli għal 2 minuti oħra. B’magħrfa mtaqqba tella’ l-basal u t-tewm mit-taġen għal fuq platt.
- Fl-istess taġen saħħan 3 mgħaref oħra żejt taż-żebbuġa u itfa’ l-patata. Qalliha għal 5-8 minuti filwaqt li tqallibha kultant biex ma teħilx. Neħħi minn fuq in-nar.
- Saħħan il-forn għal temperatura ta’ 200°C. Idlek dixx ta’ 28ċm x 18ċm biż-żejt.
- Ifrex nofs il-patata fil-qiegħ tad-dixx u għattiha b’nofs il-kwantità tal-bakkaljaw.
- Poġġi wkoll nofs il-basal u roxx nofs it-tursin, u bżar mitħun frisk. Irrepeti saff ieħor bl-istess mod. Roxx l-aħħar mgħarfa żejt fil-wiċċ.
- Aħmi għal 25 minuta. Żejjen il-wiċċ biż-żebbuġ u bajd mgħolli.
Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.