Riċetta: Jogurt bl-għeneb

Il-jogurt is-soltu jkun magħmul mill-ħalib tal-baqra, imma madwar id-dinja insibu popli li jagħmlu l-jogurt minn kull xorta ta' ħalib, bħall-ħalib tan-ngħaġa, tal-mogħoża, tad-debba, tal-ġemel u annimali oħra, skont xi jrabbu.  Dan għaliex il-jogurt huwa ikel bnin u b'ħafna sustanzi, tassew iktar mill-ħalib innifsu.

Il-jogurt fih il-proteina, il-kalċu, ir-riboflavin (Vitamina B2), u l-vitamini B6 u B12, u peres li l-kultura tal-jogurt jikkonverti l-lattosju fil-ħalib biex isir glukosju għall-enerġija, kultant min ikun intolleranti għall-ħalib xorta jkun jista' jiekol il-jogurt. It-togħma partikolari u daqsxejn qarsa tal-jogurt hija għaliex dan iz-zokkor jiffermenta u jsir aċidu lattiku, li imbgħad jagħmel tiegħu fuq il-proteina tal-ħalib.

Huwa tajjeb li tiekol il-jogurt ta' spiss, u mal-frott jinżel tajjeb ħafna, barra li tkun qiegħed toħloq ikla ħafifa u mimlija energija u nutrizzjoni għall-ġisem kif ukoll għall-moħħ. Tista' tipprova din ir-riċetta għal jogurt bl-għeneb li hija ideali għall-kolazzjon. Il-jogurt huwa sors tajjeb ta' nutrijenti kif rajna, u barra minn hekk il-ġewż, il-flax seeds u ċ-chia seeds fihom l-omega 3 li hu tajjeb għall-qalb, filwaqt li l-għeneb għandu togħma tajba u mimli anti-ossidanti li huma wkoll tajbin għall-qalb.

Isservi: 4

Ingredjenti:

  • 1/2 kikkra jogurt tal-vanilja 
  • 1/4 kikkra ġewż imfarrak
  • 1 teaspoon chia seeds
  • 1 teaspoon flax seeds
  • 1/2 kikkra trab tal-kannella (cinnamon)
  • 3 kikkri għeneb bla żrieragħ, iswed jew aħdar, mqatta'

Tħejjija: 

  1. Hallat il-jogurt, ġewż, chia, flax u kannella ġo skutella kbira. Ħawwad kollox.
  2. Żid l-għeneb u iksihom bit-taħlita. Servi kiesaħ.