Fl-istaġun tax-xitwa u ġranet kisħin l-aktar ikla li tinżel tajjeb hija xi soppa sħuna. Is-sopop m’għandhomx għalfejn ikunu tal-istess togħma, palat u dehra. Hawn għażla kbira ta’ ħaxix fl-istaġun li tista’ tikkumbina ma’ xulxin u ma’ ingredjenti oħra bħal laħam, legumi, ħxejjex aromatiċi u ħwawar biex kull darba toħloq soppa differenti; u ma’ dawn tista’ żżid ukoll diversi tipi ta’ għaġin biex tagħmel is-soppa tiegħek ikla kompleta u sodisfaċenti.

Bħala regola, aktar ma jkollok soppa ħafifa aktar l-għaġin għal magħha għandu jkun irqiq, bħal tarja, stilel u xgħir; għalkemm ma’ brodu lixx bħalma hu dak tat-tiġieġa jmur tajjeb ħafna wkoll għaġin mimli bħal tortellini jew ravjul.

Jekk għandek soppa bħall-minestra uża għaġin kemxejn akbar bħal żibeġ jew bebbux żgħir. L-aħjar mod huwa li tqatta’ l-ħaxix fl-istess daqs tal-għaġin li se tuża fis-soppa, meta s-soppa ma tkunx se titħanha. Imbagħad f’sopop aktar goffi u mimlijin bħall-kawlata jew il-pasta e fagioli tista’ tuża għaġin akbar bħal imqarrun, fusilli jew għaġin ieħor ta’ dan id-daqs.

Meta ssajjar l-għaġin fis-soppa stess trid iżżomm f’moħħok  li dan se jikber u jixrob mill-likwidu għalhekk jekk m’għandekx, pereżempju, kwantità kbira ta’ brodu, tista’ tgħalli l-għaġin għalih imbagħad iżżidu fil-brodu jew soppa li jkollok. Punt importanti ieħor huwa li sservi s-soppa hekk kif isir l-għaġin biex tevita li dan ikompli jsir u jikber bis-sħana tas-soppa stess. Jekk mhux se sservi s-soppa fil-pront, l-ewwel lesti s-soppa, imbagħad żid l-għaġin qabel isserviha.

X'taħseb dwar dan l-artiklu? Għidilna billi tħalli kumment jew ir-rating hawn taħtu agħfas share.