Bil-maqlub ta' dak li jaħsbu ħafna, il-patata fiha ħafna nutrijenti u mhix ħażina għas-saħħa. F'Malta ħafna nies idaħħlu l-ħobż mal-ikliet tagħhom. F'ħafna partijiet tad-dinja, il-patata tittiekel mal-ikla prinċipali bl-istess mod kif aħna nieklu l-ħobż.
Il-patata fiha ħafna vitamini u minerali naturali u hija ħielsa mill-qamħ u l-glutina.
Hija rħisa u l-mod kif tissajjar jista' jagħmilha ħażina għas-saħħa. Ħafna nies jieklu l-patata fil-forma ta' French Fries jew chips u anki jekk jagħmlu patata moħmija sempliċi jgħabbuha bil-butir, ġobon imdewweb u zlazi bil-krema u s-sour cream. Imma jekk tneħħi x-xaħam u l-metodi tal-qali, il-patata moħmija pereżempju, filwaqt li għandha ftit li xejn kaloriji hi abbundanti fil-fibra. Tilqa' wkoll, b'mod sinifikanti, għall-mard tal-qalb u għall-kanċer.
Il-patata hi sors tajjeb ta' vitamina B6, potassju, vitamina Ċ, manganiż, fosfru, Niacin, fibra tad-dieta u Aċidu Pantoteniku. Toffri wkoll varjetà ta' antiossidanti.
Riċerka xjentifika li saret dan l-aħħar weriet li l-patata tbaxxi l-pressjoni tad-demm għax għandha komposti magħrufa bħala Kuokamines. Dan il-kompost kien maħsub li jinsab biss fi pjanti eżotiċi u ħxejjex użati fil-mediċina Ċiniża. Issa nstab ukoll li dawn il-Kuokamines qegħdin ukoll fil-patata u t-tadam. Ix-xjentisti issa qed jippruvaw jistabbilixxu l-kwantità ta' dawn il-komposti li huma meħtieġa biex jiġġieldu l-problemi tas-saħħa u l-pressjoni tad-demm.
Nofs patata fiha nofs milligramma ta' B6. Dan in-nutrijent importanti huwa meħtieġ biex jipproduċi ċelloli ġodda fil-ġisem u l-vitamina B6 għandha rwol fis-sistema nervuża tagħna. Il-B6 tipproduċi wkoll ormoni li jgħinuna fl-irqad u ormoni li jgħinuna nkunu aktar kapaċi nħabbtu wiċċna mal-istress. Il-B6 tgħin ukoll lis-saħħa tal-qalb tagħna.
Patata moħmija waħda tagħtina 3 grammi ta' fibra imma ftakru li l-fibra tinstab l-aktar fil-qoxra u għalhekk għandi vizzju nħallilha l-qoxra meta nsajjarha anke ma' xi casserole biz-zalza.
X'taħseb fuq dan l-artiklu? Għidilna billi tħalli kumment jew ir-rating hawn taħt u agħfas share.
