Read in English: Why choose local, seasonal, fresh and organic veg? 

Illum il-ġurnata, meta naslu biex nagħżlu l-frott u l-ħaxix, kulħadd kullimkien jgħidlek li għandek tagħżel il-prodott agrikolu "lokali" u "tal-istaġun". Kelmiet bħal "frisk" u "organiku" ista' jfisser ħwejjeġ differenti għal nies differenti. B'hekk ta' min inħarsu ftit lejn id-definizzjonijiet ta' ċerta terminoloġija:

* Il-lokali. Lokali jfisser li l-prodott tkabbar fl-inħawi minn fejn qiegħed tixtrih. Meta tqis id-daqs żgħir ta' pajjiżna, dan ifisser dak kollu li jikber f'Malta u Għawdex. Dan jibqa' frisk iktar fit-tul peress li ma qasamx id-dinja biex wasal għandek. Ifisser ukoll li ma jkollux kimika żejda biex tippreservah u lanqas kien miżmum ġo xi friġġ għat-tul. Barra minn hekk, jintużaw inqas riżorsi u jkun hemm inqas tniġġis sabiex wasal għandek il-prodott. 

* Tal-istaġun. Illum tista' takkwista kull tip ta' ħaxix u frott f'kull żmien tas-sena, għax ikun waslilna minn postijiet fil-bogħod li jkunu qegħdin fl-istaġun. Jekk il-ħaxix mhux tal-istaġun li qegħdin fih jiġifieri li mhux lokali, b'dak kollu li semmejna. Ifisser ukoll li t-togħma ma tkunx tajba daqs tal-prodott lokali miġbur frisk.

* Il-frisk. Għandna tendenza li naħsbu li l-frisk dejjem aħjar. Jekk il-prodott huwa lokali u tal-istaġun, il-frisk ħafna drabi huwa aħjar, iżda kultant tal-bott jew tal-friża jista' jkun aħjar, speċjalment jekk se tuża l-ħaxix u l-frott għat-tisjir. Ftakar li l-ħaxix u l-frott tal-bott jew tal-friża jiġi pproċessat meta jkun fl-aħjar tiegħu, u dan huwa ta' kwalità aħjar minn prodott impurtat, li ilu jivjaġġa ġranet sħaħ jew miżmum fil-friġġ għal xhur.

* L-organiku. Skont id-definizzjoni, l-organiku għandu jitkabbar mingħajr l-użu ta' pestiċidi u fertilizzant. "Naturali", "mingħajr additivi" u "bla preservanti" mhumiex l-istess bħal "organiku". Staqsi u tkixxef sew qabel tixtri.

Ftakar ukoll li ħafna mill-irziezet industrijali jimmodifikaw il-prodott agrikolu tagħhom b'tali mod sabiex jidher sabiħ, idum frisk u ma jismarx waqt it-trasport. Oqgħod ftit attent meta tara frotta jew ħaxixa b'forma perfetta, għax filwaqt li jkun jidher sabiħ, hemm possibbiltà kbira li t-togħma mhix se timpressjonak.

Hemm bżonn li teduka ruħek fuq il-prodott agrikolu: kun af x'inhu l-prodott lokali, meta hu żmienu, u kif tiddetermina jekk il-prodott hux organiku jew le. Hekk tkun tista' verament tgawdi l-aħjar togħma u benefiċċju għas-saħħa mill-kċina tiegħek.

Agħfas hawn biex issib lista ta' ħaxix u frott lokali u l-istaġun tiegħu hawn Malta. 

Taħseb li huwa tant importanti li tiekol il-prodott agrikolu lokali, tal-istaġun, frisk u organiku meta tqis is-saħħa u t-togħma tiegħu? Ħalli l-kummenti tiegħek hawn taħt, agħfas like u agħmel share biex inkomplu nwasslulek aktar artikli bħal dan.