Darba kultant, minflok iddur għal xi ċikkulata jew pakkett crisps, ipprova dawn l-ideat sempliċi u ta' malajr għal snack tajjeb kemm fit-togħma u kemm għas-saħħa. Bdejna bl-aktar sempliċi imbagħad dawk li jeħtieġu ftit iktar logħob. Għandek minn fejn tagħżel sew jekk għandek aptit xi ħaġa ħelwa u sew jekk mielħa! 

1. Żomm ftit għeneb bla żrieragħ fil-friża u kulhom direttament kif jaqbdek l-aptit. Tista' wkoll tbillhom fil-Philadelphia soft cheese.

2. Oħloq taħlita oriġinali ta' ġewż imħallat, biċċiet taċ-ċikkulata (il-morra hija aħjar għas-saħħa) u żbib, u żommha magħluqa f'kontenitur li ma jidħolx l-arja fih. Meta jaqbdek l-aptit kul mal-ġobon u l-frott frisk.

3. Agħmel ftit peanut butter fuq biċċa ħobż samra jew cracker tal-għażla tiegħek u poġġi biċċiet tal-banana u l-għeneb fil-wiċċ.

4. Agħmel speċi ta' kebab fuq skewer minn frott differenti jew qatta' ftit tuffieħ u bill f'taħlita ta' almond butter u għasel.

5. Itfa' taħlita ta' frott ġol-blender, żid ftit peanut butter u ħawwad kollox biex tagħmel smoothie bnin u tajjeb għas-saħħa.

6. Iftaħ tortilla u dellikha bi ftit soft cheese jew xi ħaġa simli. Raxxax ftit zokkor tal-kannella (biex tagħmlu ħallat 1/4 ta' kikkra zokkor ma' mgħarfa kannella) u poġġi ftit għeneb fin-nofs jew frott ieħor kif jogħġbok.

7. Għal xi ħaġa ftit iktar mielħa, iftaħ tortilla, dellikha bi ftit soft cheese jew xi ħaġa simli, poġġi xi slices tad-dundjan fil-wiċċ u jekk trid żid ftit rucola u tadam imqadded imqatta' rqiq. Irrombla t-tortilla u qattagħha roti roti daqs ta' gidma.

8. Għal iktar imluħa, itfa' bott ċiċri ġol-blender ma' kuċċarina tahini, ftit żejt taż-żebbuġa u ftit bżar u melħ u ħawwad sew biex tagħmel hummus. Kul mal-pita bread.

9. Itfa' bott fażola ħamra (kidney beans) ġol-blender ma' ftit żejt taż-żebbuġa, tadama u tewma mqaxxra u mqattgħa biex tagħmel dipp ieħor li jinżel tajjeb ħafna mal-galletti.