Jekk tkun sejjer xi mkien u tixtieq taqta' figura se tilbes b'mod kif jixraq l-okkażjoni. L-istess bil-mejda tal-ikel u l-ikla nnifisha meta tistieden il-familja, il-kollegi jew il-ħbieb għall-ikel. Aħseb f'dawn l-affarijiet meta tkun qiegħed taħseb x'se jkun hemm fil-platti u kif se tlibbes il-mejda.

1. Agħżel x'se tkun l-enfasi 

Is-sempliċità kapaċi turi aktar klassi milli ħafna frilli. Agħżel oġġett wieħed li tixtiequ jispikka — tista' tkun id-dvalja jew il-kulur tan-napkins jew xi platti b'disinn partikolari. Tpoġġix ħafna affarijiet li jgħajtu għall-attenzjoni flimkien għax l-għajn se tara ġigġifogu flok tapprezza s-sbuħija ta' kull oġġett.

2. Poġġi xi ħaġa f'nofs il-mejda

Tista' tpoġġi xi fjuri jew xemgħat jew kwalunkwe oġġett li jirrifletti l-gosti tiegħek fit-tiżjin. Kun kreattiv u toqgħodx lura — tiskanta kemm tista' tagħmel differenza xi ħaġa oriġinali f'nofs il-mejda.

3. Agħżel id-dixxijiet bil-galbu

Agħżel dixxijiet sbieħ u versatili, li tista' tużahom kemm fil-forn, kemm fuq il-mejda tal-ikel dritt mill-forn, kif ukoll fil-friġġ jew fil-friża wara l-ikel jekk ikun baqa' xi ħaġa. Tiffranka x-xogħol u l-ħasil tal-platti.

4. Agħżel menù addattat

It-tiżjin huwa importanti iżda l-menù iktar. Wara kollox stedint in-nies għall-ikel mhux biex jaraw il-mejda biss. Iddeċiedi kemm se jkollok platti u agħżel riċetti li tħossok kunfidenti li se jirnexxulek. Tista' tagħżel il-menù tiegħek mis-sezzjoni tal-ikel ta' littlerock.com.mt.

5. Ħejji d-dar biex tilqa' lin-nies

Qis li jkollok il-kumplament tad-dar lesta biex il-mistednin tiegħek iħossuhom milqugħin u komdi. Ara 6 modi kif tħejji d-dar biex tilqa' lin-nies. 

X'taħseb fuq dan l-artiklu? Għidilna billi tħalli kumment jew ir-rating hawn taħtu agħfas share.