Riċetta: Tiġieġ bil-cashews

Riċetta Tiġieġ bil-cashews

Dan il-platt sabiħ huwa mogħni b’togħmiet miċ-Ċina u huwa faċli ħafna biex tippreparah jekk trid tħalli l-mistednin impressjonati.

 

Ingredjenti

  • 680g sidra tat-tiġieġ mingħajr għadam u ġilda, imqattgħa f’biċċiet ta’ 2.5ċm
  • 2 mgħaref dry sherry
  • 2 kuċċarini ġinġer frisk, imqatta’ rqiq ħafna
  • 3½ kuċċarini dqiq tal-qamħirrun (cornflour)
  • Melħ oħxon
  • ½ kikkra brodu tat-tiġieġa baxx fis-sodju
  • 2 mgħaref soy sauce
  • 1 mgħarfa ħall tar-ross
  • 2 kuċċarini zokkor
  • 1 mgħarfa, u 2 kuċċarini oħra, żejt veġetali
  • 2 sinniet tewm, imqatta’
  • ⅔ kikkra cashews mingħajr melħ, inkaljati
  • 2 basliet ħodor friski, il-parti l-ħadra u l-parti l-bajda separati, imqattgħin irqiq
  • Ross abjad mgħolli, biex isservi

 

  1. F’bieqja ħallat it-tiġieġ max-sherry, ġinġer u 1½ kuċċarina dqiq tal-qamħirrun. Żid niskata melħ u kessaħ fil-friġġ għal 30 minuta.
  1. F’bieqja oħra ħallat il-brodu, is-soy sauce, il-ħall, iz-zokkor, u 2 kuċċarini dqiq tal-qamħirrun. Għalissa warrab iz-zalza
  1. Saħħan mgħarfa żejt f’taġen kbir bil-qiegħ oħxon fuq nar medju. Żid nofs it-tiġieġ u sajjar għal madwar 5 minuti sakemm isir lewn id-deheb. Meta jsir kompletament ittrasferih fi platt.
  1. Fit-taġen saħħan kuċċarina oħra żejt u itfa’ t-tiġieġ li jkun fadal, sajjar bl-istess mod u baxxi n-nar jekk jibda jsir malajr wisq. Ittrasferih fil-platt mal-kumplament.
  1. Fl-istess taġen saħħan kuċċarina żejt, żid it-tewm, il-cashews u l-parti l-bajda tal-basal. Qalli, filwaqt li tħawwad kontinwament, sakemm jirtab it-tewm, madwar 30 sekonda.
  1. Ħabbat sewwa z-zalza, ferragħha fit-taġen u żid it-tiġieġ. Tektek sakemm iz-zalza tibda tagħqad, madwar 30 sekonda.
  1. Servi mar-ross u roxx bil-parti l-ħadra tal-basla.