Riċetta: Gnocchi tal-patata stil Taljan magħmulin id-dar

njokki, gnocchi,

L-ignocchi huma speċi ta' għaġina mgħollija jew moħmija (dumplings) magħmulin mill-patata u d-dqiq li mbagħad tista' sservihom biz-zalza bħall-għaġin. Forsi ġieli kiltu dan il-platt tradizzjonali Taljan iżda l-ignocchi magħmulin id-dar żgur li mhumiex xi ħaġa komuni fil-kċina Maltija. Hawn għandek riċetta ferm sempliċi kif tista' tagħmel l-ignocchi tal-patata fuq stil Taljan.

Preparazzjoni: 50 minuta

Ħin totali: sagħtejn

Isservi: 8 persuni 

Ingredjenti:

  • 1.1 kg patata
  • Melħ oħxon
  • Kikkra u 3/4 dqiq
  • Bajda kbira mħabbta

Tħejjija:

  1. Għalli l-patata fl-ilma bil-melħ ġo borma kbira; naqqas in-nar sabiex itektek u sajjar il-patata sakemm tirtab.
  2. Roxx ftit dqiq fuq żewġ tilari miksijin, u warrab.
  3. Neħħi l-ilma mill-borma u qaxxar il-patata waqt li għadha sħuna. Għaffeġ il-patata (tista' tuża ricer jekk għandek) u ħalliha tibred.
  4. Poġġi d-dqiq ġo skutella ma' żewġt imgħaref melħ, żid il-bajda u ħawwad mal-patata biex tagħmel l-għaġina.
  5. Kompli ħaddem l-għaġina għal madwar 4 minuti sakemm tiġi uniformi iżda mhux elastika; żid iktar dqiq jekk issir twaħħal. Tħaddimhiex iżżejjed.
  6. Aqsam l-għaġina fi 8 biċċiet. Rembel kull porzjon f'dudu ta' madwar 60 ċm tul u 1.5 ċm wisa'. Qatta' t-tul f'biċċiet żġħar ta' madwar 1.5 ċm.
  7. Rembel kull biċċa ma' furketta biex tagħmel il-linji u poġġi l-ignocchi fuq it-tilari. 
  8. Għalli fl-ilma bil-melħ għal madwar 2 minuti jew sakemm l-ignocchi jitilgħu fil-wiċċ.
  9. Neħħi l-ilma u itfa' l-ignocchi mill-ewwel fiz-zalza. Ikklikkja hawn biex tara kif tista' tagħmel zalza Marinara bit-tadam, it-tewm u l-ħabaq. 

Jekk tixtieq tlesti l-ignocchi minn qabel, tista' tħallihom sagħtejn joqogħdu fuq it-tilar u għattihom. Għamlilhom ftit żejt taż-żebbuġa.

Inkella tista' tiffriża l-injokki billi ddaħħalhom kif inhuma fil-friża, fuq tilar, imbagħad poġġihom ġol-boroż ladarba jkunu ffriżati; oħroġhom mill-friża nofs siegħa qabel issajjarhom.