Riċetta: ‘Tacos’ bit-tofu, it-tadam u l-pitravi

Ħafna nies iqisu 't-tofu, li jixbaħ xi ġobon magħmul mil-fażola tas-soja (soya beans), bħala ingredjent li jiekluh biss il-veġetarjani u l-vegani bħala sostitut għal-laħam għaliex fih ħafna proteina. Iżda t-tofu kapaċi joħloq riċetti interessanti għaliex jassorbi ħafna miz-zalza li ssajru fih u b'hekk jieħu ħafna togħma. It-tofu ssibu ta' żewġ tipi: il-wieqaf (firm) u l-artab (silken). 

Ġeneralment issib it-tofu l-iktar f'riċetti Ażjatiċi, iżda hawn tista' tipprova riċetta tat-tacos bit-tofu, it-tadam u l-pitravi li xxaqleb iktar lejn l'Amerika t'Isfel. Għal din ir-riċetta nirrikmandaw it-tofu l-wieqaf għalkemm l-ieħor tajjeb ukoll. Agħżel int kemm tixtieqha tiġi taħraq din ir-riċetta billi tibdel il-kwantitajiet ta' felfel li tuża.

Ħin: 45 minuta

Isservi: 4 persuni, tagħmel 8 tacos

Enerġija (kul porzjon ta' 2 tacos): 269 kalorija

Ingredjenti:

  • 450g tadam
  • 225g weraq tal-pitravi (Swiss chard), neħħi z-zokk u laħlaħ sew
  • Kaxxa tofu tal-400g mqatta' kaxxi kaxxi 
  • Nofs kikkra basal aħmar mqatta' 
  • 2 sinniet tewm maħkuk
  • Kuċċarina żrieragħ tal-kemmun (cumin seeds) mixwijini ftit u midħunin
  • Kuċċarina trab tal-felfel mild 
  • 1 - 2 felfel friski, skont il-gosti
  • 1/4 kikkra coriander jew skont il-gosti
  • Mgħarfa żejt grape-seed
  • Melħ skont il-gosti
  • 8 tortillas tal-qamħirrun imsaħħnin
  • Salsa fresca (jekk tixtieq) - għal riċetta tas-salsa fresca ikklikkja hawn

Tħejjija:

  1. Saħħan il-fron fuq broil, bl-ixkaffa madwar 10cm mis-sħana. Għatti tilar tal-forn bil-foil.
  2. Poġġi t-tadam fuq il-foil u sajjar għal 6 minuti sakemm jiġi bit-tikek suwed. Aqilbu u sajjar għal 4-6 minuti oħra. 
  3. Neħħi mill-forn u aqleb, bil-meraq b'kollox, ġo skutella. Ħallih jibred sakemm tkun tista' taqbdu b'idejk, imbagħad neħħilu l-qalba u l-qoxra.
  4. Ħawwad it-tadam ġo blender biex tagħmel purée.
  5. Sadanittant għalli borma bl-ilma u ftit melħ.
  6. Għaddas il-weraq tal-pitravi ġol-ilma jagħli għal minuta biss, imbagħad neħħihom u poġġihom ġo skutella bl-ilma kiesaħ bis-silġ.
  7. Neħħi l-ilma u agħfas il-weraq f'idejk biex tneħħi l-ilma żejjed. Qatta' fi strixxi ta' nofs ċentimentru u warrab.
  8. Saħħan iż-żejt ġo taġen kbir fuq nar medju. Sajjar il-basla għal madwar 5-8 minuti sakemm tirtab u tibda tismar.
  9. Żid ftit melħ, it-tewm, il-kemmun u t-trab tal-felfel u sajjar għal madwar 30 sekonda. 
  10. Żid il-purée tat-tadam u ħawwad kultant sakemm iz-zalza tagħqad biżżejjed li tista' tħalli kanal fin-nofs meta tofroq iz-zalza bl-imgħarfa. Żid iktar melħ jekk hemm bżonn.
  11. Żid il-felfel frisk u t-tofu, u għaffeġ it-tofu bil-furketta mat-tadam.
  12. Żid il-weraq tal-pitravi u kompli sajjar għal madwar 5 minuti, dejjem kompli ħawwad u għaffeġ it-tofu. 
  13. Żil il-coriander u ara jonqosx il-bżar u melħ.
  14. Saħħan it-tortillas u ifrex it-taħlita tat-tofu. 
  15. Jekk tixtieq tista' sservi bis-salsa fresca.

Tista' tlesti t-taħlita tat-tofu u żżomha fil-friġġ sa jumejn.