Kif tagħmel ‘blanching’ ta’ ħaxix u lewż

By a.fiedler (Gołąbki 5 auf flickr) [CC-BY-SA-2.0 (http://creativecommons.org/licenses/by-sa/2.0)], via Wikimedia Commons

Il-blanching huwa metodu ta' preparazzjoni li jinvolvi l-ilma jgħali biex tkun tista' faċilment tneħħi l-qoxra, per eżempju tal-lewż jew tat-tadam, għal xi riċetta partikolari, jew biex tħejji l-ħaxix għall-friża. 

 

Biex tibblanċja l-lewż (tneħħilu l-qoxra):

  • Poġġi l-lewż fi skutella.
  • Isomtu billi tgħarru bl-ilma jgħali.
  • Ħallih għal madwar minuta u mhux iktar.
  • Neħħi l-ilma, laħalħu bl-ilma kiesaħ u erġa' neħħi l-ilma.
  • Nixxfu b'biċċa nadifa u tara kif tista' faċilment iżżerżaq il-qoxra minn fuqu!

 

Biex tħejji t-tadam għall-polpa jew għaz-zalza:

  • Agħażel tadam frisk u solidu. Tużax tadam li beda jmur.
  • Fit-tarf ta' kull tadama aqta' 'X' b'sikkina msinna.
  • Għalli l-ilma ġo borma.
  • Ismot it-tadam billi tgħerrqu fl-ilma jagħli għal madwar 30-60 sekonda.
  • Fil-pront itfgħu ġo ilma kiesaħ silġ. Tinnota li l-qoxra tibda tinqala' waħidha.
  • Neħħi t-tadam minn ġo l-ilma u qaxxru.
  • Neħħi l-qalba b'sikkina u għandek it-tadam lest għaz-zalza.

 

Biex tħejji l-ħxejjex għall-friża:

Li tibblanċja l-ħaxix qabel ma titfgħu fil-friża hija parti importanti fil-preservazzjoni tiegħu għaliex dan irażżan l-iżvilupp tal-enzimi li jaffettwawlu l-kwalità. 

  • Għalli l-ilma ġo borma kbira; huwa importanti li jkollok ħafna ilma biex il-ħaxix isir malajr.
  • Għarraq il-ħaxix fl-ilma li qiegħed jgħali; huwa importanti li waqt li l-ħaxix qiegħed isir, il-borma tibqa' mikxufa.
  • Żomm in-nar għoli u ħalli l-ħaxix fl-ilma għal ftit sekondi sa ftit minuti biss, skont it-tip ta' ħaxix (ħares taħt għal xi indikazzjonijiet); dan hu importanti biex il-ħaxix jibqa' frisk.
  • Neħħi l-ħaxix minn fuq in-nar, u itfgħu direttament f'ilma bis-silġ biex il-ħaxix ma jibqax isir.

Uża din il-gwida ġenerali għall-ħinijiet ta' ħxejjex differenti:

  • Asparagu - 4 minuti
  • Fażola ħadra - 3 minuti
  • Brokkoli - 3 minuti 
  • Kaboċċi żgħar (Brussells sprouts) - 5 minuti
  • Karrotti żgħar - 5 minuti
  • Karrotti, imfellin - 3 minuti
  • Qamħirrun, sbula kbira (corn-on-the-cob) - 11 minuti
  • Qamħirrun, waħdiet (sweetcorn) - 4 minuti
  • Piżelli ħodor - 90 sekonda
  • Patata - 3 sa 5 minuti
  • Qargħa tas-sajf - 3 minuti
  • Kaboċċi - 30 sekonda sa 2 minuti