Riċetta: Għaġin bil-karfus, tuffieħ u ‘bacon’

Aħna l-Maltin inħobbuh dak il-platt għaġin kultant, imma forsi nsibu ruħna dejjem insajru l-istess platti. Għal xi ħaġa verament mhux tas-soltu, ipprova din ir-riċetta għal għaġin bil-karfus, tuffieħ u bacon.

 

Isservi: 4 persuni
Preparazjoni: 30 min
Ħin totali: 45 min

 

Ingredjenti:

  • 2 imgħaref żejt taż-żebbuġa
  • 2 sinniet tewm, mqatta’ rqiq
  • 3 kikkri għeruq tal-karfus (celeriac or celery root), mqattgħin żgħar 
  • 1/4 kikkra patata li tinħall
  • Kikkra u nofs stokk tal-ħaxix
  • 1/2 kikkra krema
  • Nofs kilo għaġin linguine
  • Kikkra bacon mqatta’ żgħir
  • 2 tuffieħat Granny Smith, imqaxxrin u mqattgħin f’kunjardi (wedges)
  • 1/2 basla ħamra, mqatta’ strixxi rqaq
  • 1/4 kikkra nbid abjad
  • 2 karfusiet, mqattgħin irqaq, u ftit weraq għat-tiżjin

 

Tħejjija:

Ġo kazzola kbira, saħħan imgħarfa żejt taż-żebbuġa fuq nar medju-baxx, żid it-tewm u sajjar sakemm jirtab iżda mhux ismar.

Żid l-għeruq tal-karfus ix-xorta ta’ krafes u l-patata u ħawwadhom sew; sajjarhom sakemm il-patata tibda tirtab, għal madwar 5 minuti.

Żid l-istokk u l-krema u sajjar sakemm jgħali, imbgħad baxxi n-nar u ħallih itektek għal madwar 30 minuta, sakemm l-għeruq tal-karfus ikun irtab.

Ibblendja kollox biex isir purée.

Sadanittant, għalli l-ilma ġo borma kbira bi ftit melħ u sajjar l-għaġin sakemm isir al dente. Warrab kikkra minn dan l-ilma qabel ma tneħħih minn ma’ l-għaġin.

Filwaqt li jkun qed isir l-għaġin, saħħan il-kumplament taż-żejt taż-żebbuġa ġo taġen kbir (30cm) u aqli l-bejken sakemm isir iqarmeċ fit-trufijiet, għal madwar 5 minuti. Imbagħad żid it-tuffieħ u l-basal.

Kompli sajjar sakemm it-tuffieħ isir karamelizzat u ftit artab u l-basal jirtab, għal madwar 5 - 7 minuti aktar.

Żid l-inbid u sajjar sakemm jevapora kompletament u t-tuffieħ jirtab sew.

Ħawwad l-għaġin mat-taħlita tat-tuffieħ u bejken, imbagħad ferragħ il-purée bħala zalza (hemm mnejn li ma jkollokx bżonn il-purée kollu; għandu biss jiksi l-għaġin, mhux jgħarrqu).

Jekk it-taħlita tiġi wisq magħquda, żid ftit mill-ilma li kont warrabt.

Żejjen bil-weraq tal-karfus u servi immedjatament.

 

Ara il-filmat t'hawn taħt għal varjazzjoni oħra: insalata tal-għaġin bil-bacon, ġobon u krema. Dan il-filmat miġjub minn Divas Can Cook

 

Biex tesperimenta b'aktar riċetti fantażjużi bit-tuffieħ, ikklikkja hawn: Riċetti interessanti bit-tuffieħ għall-ħarifa.