Riċetta: Insalata tal-għads bit-tuffieħ, bużbież u ħwawar

L-għads (lentils) huwa sors tajjeb ħafna ta' proteina, fibra u ħadid. Hu ħafif biex tiddiġerih u huwa ideali bħala ikel nutrijenti li jżommok ħafif u mimli enerġija. Jaf ukoll jgħin biex jistabilizza z-zokkor fid-demm u jikkumbatti wkoll il-mard tal-qalb. Barra minn hekk hemm ħafna tipi ta' għads li tista' tipprepara f'ħafna modi differenti, u peress li jassorbu t-togħma tal-ingredjenti l-oħra, tista' tibqa ċert li kull riċetta tkun mimlija togħma.

Hawn taħt tista' tipprova din ir-riċetta għal insalata tal-għads bit-tuffieħ, bużbież u ħwawar.

 

Isservi: 4 persuni
Preparazjoni: 5 min
Ħin totali: 30 min

 

Ingredienti:

  • Mgħarfa ħall tas-sajder (cider vinegar)
  • 1/4 kuċċarina zokkor
  • Bżar iswed frisk u melħ
  • 2 imgħaref żejt taż-żebbuġa
  • Mgħarfa ilma
  • Basla tal-bużbież, imqatta' kaxxi kaxxi (madwar kikkra)
  • Tuffieħa (idealment Pink Lady), mqaxxra u mqatta' kaxxi kaxxi (madwar kikkra)
  • 225g tadam zgħir, mqatta' żgħir
  • 2 bottijiet (400g) għads (puy lentils), neħħi l-ilma u laħlaħhom
  • Mgħarfa sagħtar frisk mqatta'
  • 2 imgħaref ħabaq frisk mqatta'

 

Tħejjija:

 

Ġo skutella kbira, ħabbat il-ħall, iz-zokkor, il-melħ u l-bżar sakemm jinħall iz-zokkor.

Żid iż-żejt taż-żebbuġa u ħawwad sakemm it-taħlita ssir uniformi.

Żid l-ilma u ħawwad biex it-taħlita tinħall iktar.

Żid il-bużbież, it-tuffieħ u t-tadam, ħawwad kollox flimkient u ħallihom għal 15-il minuta.

Żid l-għads u l-ħwawar u ħallihom joqgħodu għal 15-il minuta oħra. Servi.

 

Biex tesperimenta b'aktar riċetti fantażjużi bit-tuffieħ, ara dan il-filmat ta' stevescooking biex issajjar is-salamun b'risotto tal-ispinaċi u tuffieħ bil-bużbież.

Iktar riċetti bit-tuffieħ issibhom hawn: Riċetti interessanti bit-tuffieħ għall-ħarifa.